24 ЧАСА: Доставени предлози за намалување на цените на група производи; Зеленски нема да го прифати исходот од американско-руските разговори без учество на Украина, Дерала злоупотребен како „аргумент“ против и во корист на Груевски

ВЕСТ НА ДЕНОТ

Трговците доставија предлози за намалување на цените на групи производи

Стопанската комора на трговци на големо и мало претежно со прехранбени и непрехранбени производи, пијалаци и тутун, денеска до Владата, Министерството за економија и труд и Државниот пазарен инспекторат ги доставила предлозите за обезбедување ефективни мерки за намалување на цените на групи производи.  Како што информираат од Комората, предлозите се подготвени по одржаниот состанок во петокот во Министерството за економија и труд, заедно со министерот, заменик-министерот, претставници од релевантни институции, како и членови на Комората.

ИЗЈАВА НА ДЕНОТ

Зеленски: Украина нема да го прифати исходот од американско-руските разговори доколку не е вклучена во нив

„Украина ги смета сите преговори за Украина без Украина како преговори кои немаат резултат и ние не можеме да признаеме … какви било договори за нас без нас“, изјави украинскиот претседател Володимир Зеленски по повод најавените американско-руските разговори оваа недела за завршување на војната во Украина.

РЕГИОН

Во Хрватска неделава најавен бојкот на банките и телекомуникациите

Хрватската потрошувачка платформа „Ало, инспекторе“ денеска соопшти дека бојкотот на пекарниците во Хрватска е голем успех и најави дека тој ќе продолжи и следната недела, овојпат на банките и телекомуникациските компании бидејќи ги зголемиле цените на нивните услуги.

СВЕТ

Пет клучни поенти од Минхенската безбедносна конференција

Низа американски декларации ја потресоа минатонеделната конференција за безбедност во Минхен и предизвикаа несогласувања меѓу присутните европски политичари. Се очекуваа американските и руските претставници да се сретнат Саудиска Арабија оваа недела за да започнат преговори за ставање крај на војната во Украина, каде Украина и европските политичари не беа поканети да присуствуваат, и покрај инсистирањето дека мора да бидат вклучени за да биде веродостоен секој прекин на огнот.

АЛ-ПРЕС

Редакциски избор на ЦИВИЛ Медиа од албанските медиуми во регионот:Светските лидери со честитки за 17 години Косовска државност; Кој ги затвори вратите на Косово; Албанија нема да прими палестински бегалци; Стејт департментот бара повеќе истраги за перење пари

ПРАШАЊЕ НА ДЕНОТ: Како го оценувате настапот на Мицкоски на безбедносната конференција во Минхен?

СЛОБОДНА ЗОНА

За да се оспорат и разобличат дезинформациите често се користат „аргументи“ што се, исто така, манипулативни и лажни. Кога тоа се случува, добивате само уште една дезинформација и ништо повеќе. Еве еден таков случај, накратко опишан во новото #esPRESSo на Џабир Дерала „Како бев злоупотребен како „аргумент“ против и во корист на Груевски“.

Ало Миле

„Се чини дека секое диктаторче на овие западнобалкански простори, си има по еден свој Миле. Со Миле, си ги споделуваат големите мисли кога ќе им надојдат од малиот мозок, со Миле ја пресметуваат висината на провизијата, тактиките за избори, и секако дека Миле може да се јавува кога ќе посака, и само на Миле му креваат, дури и кога ѕвони од непознат број“, пишува Драган Мишев во БРЗА ПОШТА „Миле ми текна, и на српски“

Подготви: Б. Јордановска