По повод 3 Мај, Светски ден за слобода на медиумите, Фронтлајн се обрати со три прашања до водителката и новинарка на ТВ21, Флора Шабани, која меѓу другото вели: „Северна Македонија покажува одреден напредок во медиумската слобода, но реалноста сè уште е обележана со влијание од политички и економски центри на моќ, недоволна заштита на новинарите и проблеми со квалитетот и независноста на медиумските содржини“.
ФРОНТЛАЈН: Како би ја опишале состојбата на медиумите во нашата земја?
Флора Шабани: Медиумскиот пејзаж во нашата земја е разновиден, но се соочува со многу предизвици поврзани со професионализмот, политичкото влијание и финансиската одржливост.
Голем дел од медиумите се под директно или индиректно влијание на политички или бизнис интереси. Сè уште постои проблем со „copy-paste“ новинарството, недостаток на истражувачко новинарство и проверка на факти. Но сепак, има медиуми и новинари кои се залагаат за професионализам и етика.
ФРОНТЛАЈН: Како го оценувате нивото на медиумските слободи и слободата на изразување?
Флора Шабани: Нивото на медиумските слободи и слободата на изразување во нашата земја може да се оцени како делумно слободно, со одреден напредок во последните години, но сè уште со значителни предизвици.
Постојат различни медиумски гласови – и традиционални и онлајн – што овозможува различни погледи и мислења да бидат застапени во јавниот дискурс.
Но има случаи на вербални и физички напади врз новинари, како и судски процеси кои имаат цел да ги замолчат. Овие случаи неретко остануваат нерасчистени или неказнети. Новинарите понекогаш се принудени на самоцензура поради страв од губење на работа или од правни последици.
Северна Македонија покажува одреден напредок во медиумската слобода, но реалноста сè уште е обележана со влијание од политички и економски центри на моќ, недоволна заштита на новинарите и проблеми со квалитетот и независноста на медиумските содржини.
ФРОНТЛАЈН: Кои се вашите препораки за унапредување на медиумите и зајакнување на медиумските слободи?
Флора Шабани: Според мене овие се неколку клучни препораки за унапредување и зајакнување на медиумските слободи во Северна Македонија а тоа се обезбедување стабилно и независно финансирање преку законски механизми, поддршка за локални и регионални медиуми, унапредување на работните услови на новинарите, и донесување на закон за онлајн медиуми, со фокус на саморегулација и заштита на слободата на изразување, и чести кампањи за подигнување на јавната свест за лажни вести и дезинформации.
Дестан Јонузи / Преземено: Фронтлајн
