„Во овој момент, ние немаме дециден одговор од министерката Мила Царовска, што понатаму ќе се случува со бегалските кампови, од една страна, а од друга страна, имаме едно монструозно сценарио на партијата, која што до вчера беше на власт, за добивање политички поени во пресрет на изборите. Манипулација со народот, повеќе од јасно!“, изјави за ЦИВИЛ Медиа, професорот д-р Јове Кекеновски, анализирајќи ги актуелните случувања ширум државата, поврзани со наводната изградба на бегалските кампови.
„Најнапред СДСМ, излегувајќи со некоја стратегија, призна – односно, најави, дека е можно да се градат кампови, за потоа неумешно тоа да го демантира ресорниот министер. Од друга страна, видовме во документите дека поранешниот министер за транспорт и врски, односно Владата на ВМРО-ДПМНЕ се согласила да градат бегалски кампови, а сега, ВМРО-ДПМНЕ тоа го демантира. Односно, се обидува и целиот товар да го префрли на новата Влада, да каже дека таа нема ништо со тоа, и во меѓувреме, ги мотивира, ги инструира, ги присилува членовите и градоначалниците од редовите на партијата, да создаваат хистерија поради градењето на некакви бегалски кампови“, смета Кекеновски.
„Значи, и едните и другите се лицемерни, си играат со чувствата на народот. А, трагедијата да биде уште поголема, ВМРО-ДПМНЕ вчера со соопштение се огради, токму од оние што ги собираат потписите, токму од луѓето коишто се нивни членови, коишто работат под нивни инструкции! И сега, како човек да биде нормален и свесен во оваа држава, кога и едните и другите, си играат со неговите чувства. Ова е страшно, ова е мизерно што ѝ се случува на Република Македонија! Конечно, граѓанинот треба сам да се освести и конечно, да ги казниме, како едните, така и другите“, оценува Кекеновски.
„Треба да им веруваме на институциите. Но, за жал, немаме кредибилни политичари, коишто ги водат тие институции и политичари што ќе држат до своето ‘јас’, значи она што ќе го ветат, тоа и да го исполнат. Напротив, тие се водат од дневна политика, од политиките – или да опстојат на власт или што е можно поскоро да дојдат до власт. За жал, тоа е практика која што нѝ се случува, сите овие години од осамостојувањето“, заклучува Кекеновски.
Моника Талеска
