По изјавата пред иселениците во која кусо посочи дека и истурањето боја врз главата на новинар е слобода, премиерот Заев испрати и реакција од Њујорк, во која е дециден дека „слободното однесување не смее да загрозува ничија туѓа слобода“ и дека „чинот на истурање боја врз новинарот Героски е закана и загрозување на неговата слобода и на неговата професија – новинар“. Новинарот пак, во реакцијата на социјалните мрежи му порача на Заев дека „во вистински слободна земја, после ваква недоветна изјава, премиерот јавно му се извинува на новинарот“
„Во Македонија сега е слобода, по долги години конечно е слобода, ја враќаме демократијата, ги враќаме институциите да им служат на граѓаните. Кого и да прашате во Македонија, повеќе нема притисок, нема закана… Има отчетност и одговорност, може да се постави секакво незгодно прашање, може да видите сè што се случува, па дури и на Героски како му истураат боја врз главата, тоа беше денеска актуелно во Македонија, но, сето тоа е слобода… Вие живеете овде во Америка којашто е симбол на демократијата и слобода. Јас верувам дека и нашата Македонија може да биде добар пример за слободна и и демократска земја, каде што владеат човековите права и каде што секој гради свои перспективи“, рече во обраќањето пред македонските иселеници, на приемот организиран од Форумот за демократска Македонија во Њујорк, премиерот Зоран Заев.
Откако на социјалните мрежи имаше и остри реакции против инцидентот во Скопје, стигна и реакцијата на Заев од Њујорк, за настанот од понеделникот, кога Љупчо Палевски поранешен функционер во СДСМ, истури боја врз новинарот Бранко Героски.
„Слободното однесување не смее да загрозува ничија туѓа слобода.
Во таа насока, сметам дека чинот на истурање боја врз новинарот Героски е закана и загрозување на неговата слобода и на неговата професија – новинар.
Ги осудувам таквите дејствија кои се негативен сегмент во нашето слободно општество и апелирам да не се повторуваат. За слободата заедно се боревме и ја добивме. Но, имаме уште многу работа за нашата Македонија целосно да ја ослободиме од недемократските влијанија“, реагираше Заев од Њујорк.
На Фејсбук реагираше и новинарот Героски кој директно побара објаснување од Заев за изјавата во Њујорк.
„Шокиран сум од изјавата на премиерот Зоран Заев. Според него, нападот на Љупчо Палевски врз мене бил доказ за ‘слобода’. И тоа ‘слобода’ со која премиерот се фали пред нашите сонародници во Америка и поради која, меѓу другото, тие треба да бидат мотивирани да инвестираат во Македонија. Замислете!
Уште колку чаши или канти боја, друже Заев, кадарот на СДСМ, Палевски, треба да истури врз мојата глава, за Македонија да стане уште ‘послободна’? Кажи друже, јас и онака сум мазохист, како што вели Орданоски, па можеби ќе се жртвувам во името на привлекувањето странски инвестиции. Од кои Палевски, претпоставувам, како ‘слободоумен’ молер или ‘поттурач со боја’, ќе добива соодветни провизии. Нешто како економски промотор…
Каква е оваа изјава, друже Заев? Очигледно добро те расположил перформансот на Палевски. Можеби и затоа, по уредно пријавената закана од Палевски кон мене (да, да, кај твојот министер Оливер Спасовски), ништо не е преземено. Можеби идејата била со овој перформанс да се покаже колку Македонија е ‘слободна’ земја.
Е, мој друже Заев… Те гледам искезен кога го спомнуваш Героски. Веројатно со нешто го заслужив твојот потсмев. Само, да ти биде јасно како бел ден – во вистински слободна земја, после ваква недоветна изјава, премиерот јавно му се извинува на новинарот, кој е жртва на напад од една од најопскурните личности на денешната јавна сцена во Македонија.
Толку од мене. Пријатен престој во туѓина и уште многу попатни насмевки“, пишува Героски.