Пишува: Сашо Орданоски
[dropcap]С[/dropcap]е мачам нешто да напишам за новогодишниот говор на претседателот Иванов, а да не биде навредливо, потсмешливо, зајадливо, со иронија… И никако не ми успева. Сите квалификации и епитети за неговата политика се од другата страна на политичката коректност (се воздржувам да отворам заграда и да почнам да ги набројувам…).
Претседателот, во седмата година од својот мандат, го достигна идеалот на празната политичка супстанца, кога ни најдобронамерните не можат да одредат кои се, поточно, неговите принципиелни политички ставови. „Патриотите“ (и со и без наводници) ќе ви рипнат за врат ако се обидете да им докажете дека Иванов е патриот, оти тие се најгласни во обвинувањата дека тој е предавник… Искрените македонски националисти се доведени во таква конфузија од неговите индо-пакистански и слични историски небулози, што на самото спомнување на името на Иванов почнуваат со очи да превртуваат… Од фамилијарната централа на неговата партија ВМРО-ДПМНЕ го сметаат за плашливец и несигурен сојузник кој повеќе од еднаш ги оставил „на цедило“… Разните вмровски реформисти и антигруевисти, пак, можеби го презираат најмногу од сите… СДСМ ужива ситно да го сецка, малку да го меле, па да го испасира, пред да го карамелизира и да му ја потури кантата со помија врз глава… Дипломатите веќе одамна престанаа да пишуваат депеши по неговите јавни настапи, бидејќи никој во нивните централи тоа од нив не го бара… Е, додуше, кај Албанците не стои така лошо, како за политички мртовец.
Во такви фрагилни околности по неговиот морално-политички профил, претседателот Иванов повикува на национално помирување. Се разбира дека никој не го зема за сериозно. Како кога некоја стара баба ќе ти каже да се пазиш од промаја! (Провев, де.)
Но, работата би земала сосема друг тек, а македонската историја сигурно би се погрижила за една фуснота и за него, ако Иванов вака ја постави целата своја иницијатива: „Нацијата ни е поделена, што е многу неубава, даже и опасна работа, а бидејќи мене јавноста ме вбројува во еден од позначајните фактори за таа заваденост, јас си поднесувам неотповиклива оставка од претседателската функција, во име на почетокот на националното помирување!“
Е-хеее, тоа би била орканска промаја! Би го расчистила загадувањето за еден ден!
Како што слушам, да не веруваш, Иванов размислува и за таква постапка. Мора да му е мачно веќе сите да му се потсмеваат и да го земаат на мајтап, од Валандово, до Бразилија. (Иако се спомнуваат и некои други, вонредни околности…) Само, се распрашувал наоколу има ли шанса да се смени законот, за да може, од функцијата заминат со оставка, сепак да ја ужива претседателската пензија и другите принадлежности што по законот за бивши претседатели му следуваат.
Ако е тоа проблемот, јас за Иванов би предложил леkс специјалис: му се одобрува сѐ што ќе посака, плус 10% части кафеана! И да си го понесе советникот за национална безбедност со себе, за доживотен батлер! (Мислам дека и тој ќе се согласи на тоа заради некои други, вонредни околности…)
Целата вест можеби е лажна, ама има и смисла. А штом има смисла, барем половина е точна. Па, самиот Иванов од полувистини Кули Вавилонски изгради и ене го, ништо не му фали, зошто да не размислува и да си замине?!
Преземањето на оваа содржина е дозволено само по 12 часот, на денот на објавувањето. Потоа, важат вообичаените правила според лиценцата Creative Commons 1.0.
