Претседателот на Националниот совет на Албанците во Прешевската Котлина, Невзад Лутфиу, побара од МВР на Србија преку симболична акција да се почитува Уставот за бројот на полицајци од албанската заедница, бидејќи, како што вели, последните години ниту еден Албанец не е вработен во српското МВР во прешевската котлина, пишуваат косовските медиуми.
Според извештајот на Агенцијата за азил на Европската унија (ЕУАА), објавен во средата, околу 16.500 Албанци побарале азил во Европа и Британија во првите 6 месеци од 2023 година, пишуваат албанските медиуми.
Ова се само дел од темите од редакцискиот избор на ЦИВИЛ Медиа од албанските медиуми во регионот, за денешното издание на АЛ-ПРЕС.
СРБИЈА
Телеграфи -Симболична акција пред полициската станица во Бујановац, Лутфиу: Меѓународната заедница да внимава, Албанците се дискриминирани во Србија
Претседателот на Националниот совет на Албанците во Прешевската Котлина, Невзад Лутфиу, побара од МВР на Србија преку симболична акција да се почитува Уставот за бројот на полицајци од албанската заедница.
Во членот 77 од Уставот на Република Србија се вели: „Во однос на вработувањето во државните органи, јавните претпријатија, органите на покраината и локалната самоуправа, мора да се има предвид националниот состав и пропорционалната застапеност на националните малцинства“. Бројот на албански полицајци е многу мал, дури многу од нив се блиску до пензија“, напиша Лутфиу.
Тој понатаму рече дека во последните години, ниту еден полицаец од албанската заедница, не е вработен во полиција.
Ја повикуваме меѓународната заедница да обрне внимание на состојбата на Албанците во Србија, бидејќи дискриминацијата ги достигна границите на расизмот“, напиша меѓу другото Лутфиу, пренесе Телеграфи.
КОСОВО
Радио Слободна Европа: Денеска истекува рокот за отстранување на српските институции од објектот во Северна Митровица
„Властите во Косово предупредија дека до 8 септември четири српски институции мора да го напуштат објектот во Бошњачкото маало, бидејќи припаѓа на општината Северна Митровица.
Заменик директорот на косовската полиција за северниот регион, Ветон Елшани, за Радио Слободна Европа изјави дека „засега немаме барање“ од општината да помогне во отстранувањето на овие институции од овој објект. Сепак, тој додаде дека полицијата е подготвена да ги извршува своите работни задачи по ова прашање во моментот кога ќе биде побарано.“, пренесе Радио Слободна Европа на албански јазик.
Коха: Дијалогот меѓу Косово и Србија е тема на разговор на средбата Лајчак-Пич
Специјалниот пратеник на Европската унија за дијалогот меѓу Косово и Србија, Мирослав Лајчак, соопшти дека се сретнал со пратеникот на Велика Британија за Западен Балкан, Стјуарт Пич.
Тој во четвртокот вечерта на Твитер напиша дека е задоволство да се разговара со Пич за „напорите за дијалог“, пренесе Коха.
АЛБАНИЈА
Балкан Веб: Околу 16.500 Албанци побарале азил во Европа и Британија во првите 6 месеци од 2023 година
Според извештајот на Агенцијата за азил на Европската унија (ЕУАА), објавен во средата, во периодот јануари-јуни 2023 година, во земјите на Европската унија, албански државјани поднеле 4779 барања за азил, од кои 3602 за првиот време .
Според Европската агенција за азил, 3444 поднесени барања и во текот на другите години чекаат да бидат разгледани, додека од 4642 донесени решенија, стапката на позитивни одлуки е многу ниска за албанските граѓани и не надминува 1%, пренесува Балкан Веб.
КУЛТУРА
Зери: Османи му го врачи указот за косовско државјанство на Исмаил Кадаре
Претседателката на Република Косово, Вјоса Османи, за време на престојот во Албанија, му додели указ и државјанство на Косово на меѓународно познатиот албански писател Исмаил Кадаре.
За време на церемонијата, таа рече дека добивањето државјанство од авторот, преведено на многу јазици во светот, е чест за сите граѓани на Косово, пренесе Зери.
КОЛУМНА
Бота Сот: Политиката во Албанија е измама, корупција, омраза и предавство
„Албанската политика е политика на антивредности, таа е антипатриотска, антидемократска, неморална, предавничка, лицемерна, измамничка која промовира сервилност, себичност, корупција, омраза и неодговорност.
Политика која страда од комплексот на инфериорност до тој степен што штом албанските политичари ги реализираат сопствените цели и интереси, штом се искачат и стигнат до врвот на политиката и моќта, ги напуштаат, забораваат и игнорираат своите лојалисти и поддржувачи кои ги поддржуваа нив и го поддржуваа во деновите кога толку им требаа“, пишува авторот Скендер Капити во колумната „Политиката во Албанија е измама, корупција, омраза и предавство“, објавена во Бота Сот.
Подготви: Д. Тахири
