Агенцијата за аудио и аудиовизуелни медиумски услуги го објави својот втор десетдневен извештај од мониторингот на електронските медиуми во периодот 17-26 август. Во клучните наоди, АВМУ бележи дека, општо земено, уредувачките политики имаат тенденција да бидат отворени за различни ставови во однос на тековните општествено-политички настани, состојби и теми. Истата констатација Агенцијата ја соопштува и во првиот извештај, 7-16 август, веднаш по распишувањето на локалните избори на 6 август.
Сепак, во мониторингот на АВМУ добро се забележува дека „во централните дневно-информативни емисии, во повеќе наврати, а некаде и секојдневно, емитувани се прилози што се квалификуваат како псевдонастани или псевдовести. Овие псевдонастани ги креираат политичките партии, преку критика/критизирање на политичкиот опонент или како политички ветувања. Дел од радиодифузерите држат дистанца, дел вложуваат напори да обезбедат урамнотеженост на различните ставови, додека само кај две телевизии обемот на вакви прилози за една политичка опција, укажува на непочитување на професионалното начело за еднаков третман на различните гледишта.“
АВМУ бележи дека за темата локални избори, новинарските прилози главно се однесуваат на организациските работи во надлежност на Државната изборна комисија.
