„Опасноста од тероризам се зголеми експоненцијално во светот. Ако ги погледнете инцидентите и случаите на тероризам, ќе видите дека притисокот е врз земјите членки на НАТО, но далеку дека е само врз нив. Се работи за глобален феномен. Според анализите на земјите членки на НАТО, најоглемите ризци од тероризам се наоѓаат многу далеку од нивните граници“, вели министерката за одбрана, Радмила Шекринска, на прашањето дали со членство во НАТО ќе се зголеми или намали опасноста од тероризам.
„Дали опасноста од тероризам ќе се зголеми со влезот во НАТО?“ – беше едно од прашањата кои ги постави Џабир Дерала од ЦИВИЛ, на панел дискусијата „Македонија во НАТО: Задачи, предизвици и можности“ во организација на ЦИВИЛ.
Министерката за одбрана изјави дека еден од аргументите што треба да го искористиме и за наше членство е тоа што Македонија се наоѓа во еден регион низ кој минуваат канали врзани со екстремни идеологии и тероризам.
„Во тој дел информација и од наша страна може да биде плус за НАТО безбедноста. Меѓутоа, битно е нашите институции да се развијат“, изјави Шекеринска.
„Никој не е заштитен, за жал, од тероризмот. Но,токму поради чувството на сигурност, поедноставно е да имате некој покрај вас, отколку да сте сами“, изјави Данијела Баришиќ, амбасадорката на Хрватска.
Баришиќ кратко потенцираше дека влезот во НАТО нуди можност за превенција од тероризам преку размена на информации и добивање однапред јасна слика за опасноста од тероризам.
Сашо Орданоски, политички аналитичар, се согласи дека темелот во борабата против тероризмот е во доброто разузнавање. Следејќи ги реформите на македонската тајна служба, Орданоски смета дека е изгубено драгоцено време дебатирајќи за опасноста, во период кога самата служба беше злоупотребена за политички цели.
„Ние не можеме да ја надминеме таа визура што ја имаме и да влеземе во вистинска дебата за реформите, затоа што уште ја чуствуваме таа тајна служба како домашна закана. Она што нас ни престои е сериозна дебата како нив да ги реформираме“, изјави Орданоски, кој како учесник на таа дебата за реформирање на тајните служби, потенцираше дека процесот уште не е почнат како што треба, а законот треба да се изгласа до октомври оваа година.
„Што правиме со реформите токму на ова ниво? Го имаме претседателот кој ја има контролата токму врз оваа служба, кој можеби не официјално, одбива да биде вклучен во оваа потемелна реформа. Од друга страна таа реформа ни е предуслов за понатамошен влез, пред сè во НАТО, но и во ЕУ. Јас навистина апелирам да се ослободиме од тој комплекс тајна служба- Мијалков, и да почне да се занимава со тоа што им е работа. Тие се тука за да не заштитат од тероризам. Тоа јавноста мора да го разбере“, истакна Орданоски.
Стево Пендаровски, назначен за национален координатор за НАТО, истакна дека ние сме во најпроблематичниот регион во светот од кај што може да ни дојде тероризам со религиозна основа.
„Утре да станеме полноправна членка во НАТО, нема да бидеме поголем таргет, отколку што сме денеска. Скоро дваесет години сме таму, од кај што потекнуваат тие проблеми и самото членство нема да стане ризик плус за тероризам“, изјави Пендаровски потсетувајќи дека наши луѓе работат на мисии во Авганистан, Ирак и други земји од каде во најголем број случаи потекнува религиозниот тероризам и никој не ја перцепира Македонија како клучна за некакви терористички цели.
„Проблемот настанува со нашите луѓе од Македонија и регионот, што учествуваат во тие војни и кога ќе се вратат можат да направат таков проблем. Притоа ако направат некаков проблем тоа ќе биде поради домашни мотиви. Но, тоа нема врска со членството во НАТО“, рече Пендаровски.
Говорниците, во контекст за членството на Македонија во НАТО и опасноста од тероризам, како последица на влегување во сојуз што се перцепира како воена структура, пред сè, се обидоа да ги минимизираат и да ги расчленат причините и последиците за и против ваквиот чекор на земјата секој од свој агол и функција.
Она во што сите се согласни е дека НАТО може да помогне, но не и да ја рангира Македонија повисоко на црната листа на терористички напади.
Глобалниот тероризам, според одговорите на говорниците, бара глобално решение, а влезот во НАТО, само може да придонесе и во заштита од и во борабата против тероризмот.
Биљана Јордановска
Камера: Атанас Петровски
Монтажа: Ермин Климента
