Нацрт-стратегијата за реформи на правосудниот сектор со Акциски план од вчера се ставени на увид на јавноста, а Работната група при Министерството за правда, при презентацијата во Охрид, посочи дека се констатирани големи проблеми и предложени бројни солуции за нивно надминување. Меѓу членовите на Работната група, постои оптимизам, но сепак, професорот д-р Борче Давитковски, за ЦИВИЛ Медиа потенцира дека со Нацрт – стратегијата има солидна основа за реформи, „но како таа ќе се операционализира, тоа ќе каже политиката“…
Документот кој се однесува на период од четири години од 2017 до 2021, предвидува подобрување на условите за работа на судиите и на јавните обвинители, распределба на судските предмети без надворешни влијанија, избор и унапредување на судии и на јавни обвинители и законски измени…
Се предлага и продолжување на работата на СЈО, како посебно одделение во Јавното обвинителство на Република Македонија, со проширена надлежност за гонење на кривични дела со висок профил на корупција, со пред две години укинатиот Закон за лустрација да бидат поништени мерките преземени против лустрираните лица, со цел нивна општествена рехабилитација и заштита на личниот интегритет и достоинство, укинување на Советот за утврдување факти и одговорност на судиите и Вишиот управен суд, намалување на бројот на судии и основни судови во државата, промена на начинот на избор на судии и јавни обвинители, како и одговорност на членовите на Судскиот совет и на Советот на јавни обвинители, кои досега беа „недопирливи“.
Според соговорникот на ЦИВИЛ Медиа, професорот д-р Борче Давитковски, Нацрт-стратегијата во ваков формат, делумно може да се имплементира, зашто еден нејзин дел е поврзан со носење на двотретински закони, чие усвојување ќе зависи од волјата на политичарите во актуелниот состав на македонското Собрание.
„Треба да се биде реален, согласно со составот и структурата на парламентот: позиција – опозиција, мислам дека за многу работи, не ќе може да се постигне двотретинско мнозинство. На пример, Законот за судови, Законот за кривична постапка, не би можеле да се донесат, би можело само во делот на Судскиот совет“, изјави за ЦИВИЛ Медиа, професорот Давитковски.
Оваа Нацрт-стратегија како што вели Давитковски, е само визија за реформи за следните четири години, и добро е да остане запишана. Документот првин треба да биде усвоен од Владата, а потоа, во парламентот.
„Каква ќе биде судбината, согласно со македонските ситуации во изминатите 25 години… Сум пишувал преку 130 закони во Македонија, а кога ќе се донесе законот, не можам да го препознаам… Идејата на стратегијата е добра, треба нешто да се реформира, да се спроведе, а политичката волја…, тоа не зависи од мене. Но, базирана е на препораките што последните 3-4 години ни ги дава ЕУ, имаме неколку пресуди на Судот за човекови права во Стразбур контра Македонија, има шест пресуди што се исто така битни. Така што, со Нацрт – стратегијата има солидна основа, но како ќе се операционализира, тоа ќе каже политиката“, дециден е д-р Давитковски.
Моника Талеска