ВЕСТ НА ДЕНОТ
Комисијата за уставни прашања денеска, со 10 гласа „за“ и 7 „против“, го поддржа Предлогот за пристапување кон измена на Уставот, поднесен од Владата и му предложи на Собранието на Република Северна Македонија, согласно член 131 став 1 од Уставот, да донесе одлука за пристапување кон уставни измени.
Предлогот за пристапување кон уставни измени предвидува во Преамбулата на Уставот, заменета со Амандманот IV, а Амандманот IV изменет со Амандманот XXXIV, после делот од бошњачкиот народ да се додадат деловите од бугарскиот народ, хрватскиот народ, црногорскиот народ, словенечкиот народ, еврејскиот народ и египќанскиот народ. Потоа, се предлага и во амандманот XXXVI на Уставот, со кој се заменува членот 49 и Амандманот II, после делот од бошњачкиот народ да се додадат деловите од бугарскиот народ, хрватскиот народ, црногорскиот народ,словенечкиот народ, еврејскиот народ и египќанскиот народ.
Собраниската седница за уставни измени е закажана за 18 август.
ИЗЈАВА НА ДЕНОТ
„Во следните недели кога е првото гласање јасно ќе стане кој мисли за себе, а кој мисли и за своите деца и за граѓаните што ги претставува. Секој сам треба да одлучи дали ќе даде глас за Европа, глас за интеграција, или ќе го задуши гласот на совеста во себе и ќе одлучи да ја однесе земјата во изолација, по нечиј налог донесен од личен интерес или интерес на други страни“ рече премиерот Димитар Ковачевски во неговото обраќање пред Комисијата за уставни прашања во Собранието.
ВОЈНА ПРОТИВ УКРАИНА
Откако без да наведе никакви докази, рускиот претседател обвини дека Полска сонува да заземе делови од Украина и Белорусија кои претходно биле под нејзин домен и ја предупреди Полска дека секој напад врз Белорусија ќе го смета за напад врз Русија, Александар Лукашенко, белорускиот претседател, набрзо потоа излезе со тврдење дека платениците од Вагнер, улогорени во неговата земја, се очајни да ја нападнат Полска, а тој прави сé за да спречи платеници да ја преминат границата со соседната земја.
Повеќе: https://tinyurl.com/36dzts9e
ФЛЕШ ВЕСТИ
ИНСПЕКЦИЈА Трудовиот инспекторат донесе мерка за поништување на отказите на вработените во „Комунална Хигиена“
ДАНОК Околу 200 компании би требало да бидат опфатени со данокот на солидарност, соопшти директорката на Управата за јавни приходи Сања Лукаревска, а проценките се врз основа на евиденциските анализи што ги има направено УЈП согласно даночните биланси што ги имаат доставено компаниите во Управата.
СРЕДБА Вицепремиерот за економски прашања, Фатмир Битиќи, се сретна со новата директорка на Делегацијата на германското стопанство во земјава (АХК), Антје Ванделт.
ГОВОР НА ОМРАЗА
ЦИВИЛ Центар за слобода најостро го осудува и бара итна реакција за експлицитните закани и говор на омраза упатени кон новинарката на Алсат М, Рита Бехадини на нејзината објава во врска со јавниот став од страна на оџата од Сарај на социјалната мрежа Фејсбук.
Повеќе: https://tinyurl.com/2vvryep
АНАЛИЗИ
Клуни и Прендергаст: Како Западот може да го убие вирусот „Вагнер“
Во деновите откако групата Вагнер го напушти својот марш кон Москва на 24-ти јуни, се зголемија шпекулациите за тоа што ќе биде со озлогласената руска паравоена компанија и нејзиниот водач, Евгениј Пригожин. Во услови на извештаи за претседателот Владимир Путин кој ги пробива средствата и распоредувањето на војниците на Вагнер, како и со статусот и местото каде што се наоѓа самиот г-дин Пригожин, покриени со мистерија, иднината на групата – и нејзината обемна деловна империја – е нејасна.
СЛОБОДНА ЗОНА
„Како функционираат пропагандните машинерии? Тие се служат со низа софистицирани методи што се невидливи за просечниот корисник на социјалните мрежи. Се работи за масивни и исклучително скапи операции, кои вклучуваат комплексен систем од средства за јавна комоникација, широка коруптивна мрежа и апаратус за принуда, заплашување и – елиминација. Затоа, имајќи го ова предвид, кога ќе погледнеме на тоа што пропагандата прави на социјалните мрежи, ни се чини како детска играчка. Сепак, тоа не е целосно точна констатација“, пишува Џабир Дерала во денешниот ЕДИТОРИЈАЛ со наслов „Секогаш ќе има платени насилници, вознемирени „патриоти“ и корисни идиоти“
За родовата еднаквост наспроти дезинформациите пишува Жарко Трајановски во „Mедиумите треба да промовираат родова еднаквост, а не антиродови пропагандисти и дезинформации“
Подготви: Б. Јордановска