По една недела од потпишување на договорот со Грција, гледам, читам, слушам навреди, пцовки, повици за линч, гнасотилоци…, особено на социјалните мрежи и на протестите за зачувување на името.
Дебатата „за“ и „против“ е сведена на лични квалификации и навреди, без вистински аргументи и конструктивни докази.
Дежурни виновници по дифолт се „Албанците“ (Шиптари) и „Ромите“ (Цигани), особено откако Амди Бајрам даде целосна поддршка на договорот. Навредите и понижувањата немаа(т) крај… „Имебраните“ не се штедеа во искажување на сето труло што го имаат во нивниот однос кон другите и кон тоа што за нив претставува Македонецот. „Македонија на Македонците“. Амин!
„Како се вика Циган во Македонија? Северџан!“, гласи еден твит.
Дури се и чудни и нејасни пофалбите и изјавите на власта дека и помалите етнички заедници даваат целосна поддршка на договорот. Се чини дека помалите етнички заедници се доживуваат како да се втора група на граѓани, па немаат екслузивитет да одлучуваат за договорот, како да се кираџии во сопствената држава.
Некој ги набројал со име и презиме сите пратеници кои гласаа за ратификација на договорот, нагласувајќи ги „предавниците“ кои имаат поразлични презимиња од тие кои завршуваат на „ски“. Демек ете кој ја крои судбината на Македонците, коментарите не би ги спомнал, затоа што тое е на некој начин гнасна поезија составена од гнасотилаци.
Секој има право на протест и искажување на спротивни ставови. Ако некој повикува на „Чиста Македонија“, тогаш нека не очекува од останатите етнички заедници дека ќе ги поддржат таквите протести, иако има и граѓан(к)и кои не се Македонци и не го подржуваат договорот, но со навредите кон нивната етничка заедница брзо (ќе) се смени нивниот став.
Виновници и предавници се и новинарите кои не застануваат во одбрана на името. Од навивачката група „Комити“ истакнуваат: „Во последено време, одредени рекетарски новинари и медиуми се обидуваат да не оцрнат, но очигледно не сфатиле ниедна од нашите пораки. Ако вашиот мизерен живот е ставен во служба на политичките елити и немате сопствено јас, ние не сме ви криви, сеедно ви е и по вас ќе дојдеме“.
Ниту еден закон или договор не се промени со националистички протести и медиумски содржини поткрепени со говор на омраза, напротив. Затоа следните протести и дебати би било добро да се сведени на докази и аргументи за некои/а граган(к)и да може да изградат сопствен став.
Дотогаш ќе се труеме со омраза кој е предавник а кој е патриот, и ќе учиме како се сака државата од фудбалските натпревари, на пример, кога јапонските навивачи си го собираа(т) сметот од трибините, како навивачите на Панама се радуваа на постигнат гол, иако нивната репрезентација изгуби 6:1…
