По објавата за признанието на Никола Груевски за оставка од лидерската позиција во ВМРО-ДПМНЕ, Џабир Дерала, претседателот на ЦИВИЛ – Центар за слобода, во изјава за ЦИВИЛ Медиа ја коментира веста за оставката на Груевски и денешната реакција на ЦИВИЛ.
„Сметам дека јавноста треба да знае и се разбира да биде алармирана за една нова вест, најновата вест, веста на денот, а тоа е дека Никола Груевски конечно во својот омилен портал потврди дека одамна планирал оставка и дека и во своите говори уште на 15 октомври тој кажал, со различни изразни средства, дека размислува да поднесе оставка, но никој не го разбрал.
Ние го разбравме тоа и веќе на 12 ноември објавивме вест за тоа дека Никола Груевски планира да даде оставка. Неполни два часа по таа вест добивме демант од ВМРО-ДПМНЕ дека Никола Груевски останува лидер на ВМРО-ДПМНЕ. Меѓутоа, две недели подоцна Никола Груевски конечно признава пред својата партија и пред целата јавност дека планирал да даде оставка и дека тоа ќе го направи.
Тоа е една добра поента која доста добро зборува и за истражувачите во рамките на ЦИВИЛ Медиа. Меѓутоа, би сакал во име на ЦИВИЛ – Центар за слобода, организација за човекови права, да ја алармирам јавноста за една друга поента.
Не смееме да се залажуваме со тоа дека Никола Груевски ќе поднесе оставка на челното место на партијата која ја води подолго време. Затоа што Никола Груевски, освен тоа што ќе поднесе оставка треба да поднесе и одговорност за низа обвиненија кои се документирани и кои се во процес и кои се започнати со Специјалното јавно обвинителство. Значи, тоа што тој можеби се договорил со некого или со некоја структура, а за тоа да добие извесни олеснувања, не би смеело да помине во јавноста. Ние очекуваме правда за сите дела и недела кои ги направиле сите кои се огрешиле од законот. Оттаму произлегува дека и Никола Груевски треба да одговара за тоа што го направил.
Тоа што ќе одговара пред судот на својата партија е една работа. Тоа, на крајот на краиштата, е интерна работа на ВМРО-ДПМНЕ. Тоа што го направил во земјата, на државата, во општеството, за тоа треба да се занимава со еден поинаков вид на институции“, вели Дерала.
