По барање на адвокатот Никола Додовски, судијката ги отстрани новинарите од денешното рочиште на случајот познат во јавноста како „Тврдина 2“. Новинарите биле избркани додека се читал дописот од Министерството за внатрешни работи до СЈО, иако според специјалната јавна обвинителка Ленче Ристевска, тоа не е класифициран документ и нема потреба да се отстрани јавноста, јави „А1 он“.
Претседателот на ЦИВИЛ – Центар за слобода, Џабир Дерала, вели дека ова не е единствен случај да се ограничува правото на јавноста да знае, во случаи кои ги води СЈО.
„Претходно, Никола Груевски бараше да нема новинари во близина на судот кога тој се појави таму за првпат. Како беше постигнато тоа? Кој им забрани на медиумите да ја вршат својата работа?“, прашува Дерала. Тој смета дека постапката на отстранување новинари од судница без причина, треба само да се додаде на долгата листа од неприфатливи постапки на власта и на нејзините послушници, против демократските стандарди, против правото на јавноста да знае што се случува.
„Притисокот врз медиумите и манипулирањето со јавноста се вообичаена пракса на власта во заминување. Кога во 2012 година, пратениците на опозицијата беа насилно исфрлени од парламентот со специјални полициски сили, и новинарите беа тепани и исфрлени од новинарската ложа! Исто така, ТВ ТВ А1 и три дневни весници беа затворени среде ноќ, и со специјалци. Кога новинарките и новинарите протестираа за ‘Случајот Кежаровски’, на нив испратија специјалци. Министерот Пешевски физички го нападна новинарот Ивановски, а директорот на Државниот архив, јавно повика на негова ликвидација. Апологетите на власта повикуваат на егзекуција на новинари, интелектуалци и активисти за човекови права“, изјави Дерала за ЦИВИЛ Медиа.
Во случајот „Тврдина 2“ денеска беше второто подготвително рочиште, иако судијката на минатото рочиште најави дека ќе биде главно рочиште. Во овој случај, обвинети се поранешниот началник на Петтата управа во УБК, Горан Грујовски и уште шестмина други вработени во оваа Управа. Тие се товарат дека уништиле 2.047 службени списи, од кои 22 на тајната полиција, за набавка на опремата за следење на комуникациите.
М. Ивановска