Дозволен влез во угостителските објекти и на настаните на отворено ќе имаат, освен вакцинираните, и лицата кои прележале КОВИД-19, објави денеска министерот за здравство, Венко Филипче.
“Оние кои прележале”, како што изјави Филипче, “доволно е да поседуваат медицинска потврда дека биле заболени од КОВИД-19 во рок не подолг од 45 дена” и додаде дека новите рестриктивни мерки што треба да стартуваат од 16 август се во насока на зашита на јавното здравје.
Ова е своевидно дополнување на одговорот на прашањата што ги постави ЦИВИЛ МЕДИА до Министерството за здравство на 12 август, кога оттаму одговорија дека пристап ќе имаат само целосно вакцинирани лица.
“Верувам дека сите сме свесни, дека граѓаните се свесни оти се работи за мерки во насока на заштита на здравјето. Такви мерки се воведени во сите развиени земји во Европа и во светот. Во принцип за сите важи потребата од приложување сертификат за вакцинација, единствено што е воведено како забрана е огранизирање свадби и веселби во затворен простор, од причина што на такви прослави тешко се спроведуват и запазуваат протоколите за заштита”, изјави Филипче.
За предвиденото воведување редарски служби од страна на угостителите, Филипче рече дека тие се во насока на заштита на самите угостители и дека при воведувањето на мерките е разговарано со сите субјекти, а додаде и дека е отворена опцијата за дополнителни консултации за какви било потешкотии или предизвици што би се јавиле при спроведувањерто на новите протоколи и мерки.
Од вкупно 3497 пациенти дијагностицирани изминатите седум дена, 3047 се невакцинирани, односно само десет проценти се вакцинирани и се позитивни, а тие кои се во болница на лекување имаат прилично стабилна состојба, изјави денеска министерот за здравство Венко Филипче. Тој ги охрабрува граѓаните да се вакцинираат бидејќи тоа е начинот на којшто ќе се постигне колективен имунитет и ќе може нормално да се живее.
Според него, бројот на новодијагностицирани и хоспитализирани е посебно голем во градови каде што опфатот со вакцинација е околу дваесетина проценти. Тоа се Куманово, Тетово, Гостивар, Кичево. Во Охрид, опфатот со вакцината е 50 проценти и има помалку од десет хоспитализирани пациенти.
“Одличен е одѕивот после најавата за новите мерки кои стартуваат од 16 август. Околу 8.000 граѓани во просек на ден се јавуваат да примат прва доза на вакцина. Верувам дека ќе продолжиме со таа динамика и за прилично кратко разумно време ќе се зголеми опфатот со вакцинација”, изјави тој.
Во однос на вакцините, рече дека има доволен број, а ја најави и донацијата од Бугарија на вакцината „Фајзер“.
Притоа дека државите е инсистираат на вакциција, наведувајќи го вчерашниот пример на Канада каде што ќе биде задолжителна вакцинацијата на сите во јавниот сектор.
М. Ј.
