„Фридом хаус“ го објави извештајот „Слободите во светот“ за 2016-та година, според кој, Македонија се наоѓа на 57 место, во групата „делумно слободни земји“. Во однос на земјите од соседството и пошироко, во последниот извештај на „Фридом Хаус“, Македонија, заедно со Косово, Албанија, Црна Гора и со Босна и Херцеговина, е сместена во категоријата „делумно слободни земји“, додека другите балкански земји – Грција, Бугарија, Србија, Романија, Хрватска – се во категоријата „слободни земји“.
Македонија е рангирана повисоко од Косово и Босна и Херцеговина, но пониско од Албанија и Црна Гора.
Според извештајот, лидерите на Босна и Херцеговина, Србија, Црна Гора и на Македонија, ги малтретираат критичарите од редовите на граѓанското општество, ги попречуваат истрагите за незаконските дејства на владата и ги игнорираат уставните процедури, решителни во своите намери и покрај критиките. Набљудувачите изразуваат загриженост дека „напредокот кон демократските стандарди се заменува со токсична мешавина на национализам, корупција, неправилно функционирање на владата и на вмешување од Русија“.
Во извештајот се оценува дека на Балканот состојбата со изборните процеси и со владеењето на правото е уште повеќе влошена откако, Европската унија ја пренебрегнала нејзината улога во промовирање на демократијата кај земјите кои се стремат да станат дел од Унијата.
Во извештајот се рангирани 195 земји, од кои 87 или 45 отсто се – слободни, 59 или 30 отсто, меѓу кои и Македонија, се – делумно слободни, а 49, односно 25 отсто, се – неслободни.
