„Фејсбук“, „Јутјуб“, „Твитер“ и корпорацијата „Мајкрософт“ информираа дека формираат онлајн групација „Глобален интернет форум“ за борба против екстремизмот и тероризмот.
Во заедничката декларација се вели дека соработката ќе биде во насока на решенија за проблемот со тероизмот, ќе споделуваат техники за класификација на содржините што се објавуваат и ќе воведат ефикасни методи за известување на корисниците.
„Создадениот ‘Глобален интернет форум’ за борба против тероризмот, ќе оформи структура со постојните и идните сфери на соработка меѓу нашите компании и ќе ја насочи соработката со помалите технолошки компании, групи од цивилно општество, ќе соработуваме со научници, со владите на државите и со наднационални организации како што се Европската унија и Обединетите нации. Ова е со цел – поефикасна борба против екстремистичките и терористичките групи кои сè помасовно ги користат социјалните мрежи“, се вели во декларацијата на компаниите.
Како одговор на притисокот од Европа и САД за сè позачестените терористички напади, овие компании најавуваат споделување на технички средства за поништување на терористички содржини.
Со усвојување на пакет-мерките за борба против тероризмот од Европската унија за засилување на соработката меѓу членките, но и со државите во Западен Балкан, што предвидуваат борба против радикализацијата и користење на Интернет и на социјалните мрежи во таа борба, компаниите уште минатата година креираа заедничка база на податоци за колективно идентификување на терористичките сметки, без да имаат потреба од самостојно работење и трошење на ресурсите.
