„Изминаа две години од почетокот на бруталната агресија на Русија кон Украина. Две години од почетокот на оваа војна преку која една безумна автократска сака да скрши, уништи и понижи една цела земја“, изјави вицепремирката за политики на добро владеење, Славица Грковска на мултимедијалната конференција „Украина – две години хероизам“, во организација на Амбасадата на Украина во соработка со ЦИВИЛ.
„Денеска сме тука да им дадеме поддршка на украинските граѓани и лидери кои проаѓаат низ најтешкото време во своите животи. Тука сме од срце да одадеме признание за нивната храброст, непокор и одлучност да ја бранат својата земја од агресорот. Украинките и Украинците цели две години му покажуваат на светот колку е скапоцена борбата за слобода и борбата за сите оние врдности кои само во слобода можат да се негуваат и дека мирот и слободата сеуште не може да ги земеме здраво за готово, дека битката за мирот, е подалекусежна борба, таа е битка за правото и правдата. Не смееме ниту за момент да заборавиме дека борбата која Украина е принудена да ја води за да ја зачува својата самостојност, и територијален интегритет, е подалекусежна борба, борба за врвните принципи, на човечноста, хуманоста, за правото и правдата“, изјави Грковска.
Грковска истакна дека оваа војна уште еднаш покажа дека режим кој убива за да опстои и во кој владеат тесните интереси на малкумина, по цена на животите и на својот и друг народ, најмногу е против демократијата и владеењето на правото, истакнувајќи ја важност на функционалната демократија.
„Се надевам дека не е далеку денот кога повторно ќе се собереме, но да одбележиме крај на војна и да го прославиме мирот и се надевам дека што побрзо ќе дојдат деновите кога како дел од европското семејство, заеднички ќе ја градиме иднината во радост, спокој и слободарски дух“, истакна Грковска.
Б. Ј.
камера: Атанас Петровски
монтажа: Ариан Мехмети
фотографија: Б. ЈОрдановска
