На Никола Груевски му е изречена казна затвор од две години за случајот „Тенк“, и тој денес во изјава за медиуми кажа изјави дека ја добил пресудата, но не и упатниот акт каде ќе треба да ја одлежи казната.
„Јас не сум посебно изненаден од ова што се случуваше, јас само се потсетувам и секогаш ќе се потсетувам на изразите на лицата на моите адвокати кога читаа што донеле како одлука судиите, нивната вчудоневиденост, фаќање за глава и неверување во тоа што го читаат, откако претходно им бев кажал дека ќе донесат одлуки какви што донесоа, тие ми тврдеа дека е невозможно и не може да се случи“, изјави денеска Груевски.
Тој додаде дека ќе ги искористи сите правни можности кои што ќе му бидат на располагање и кои што ќе му ги советуваат адвокатите, иако е свесен, како што вели тој, дека делуваме и живееме во едно ненормално време, кога нормалното станало ненормално, а ненормалното станало нормално.
Груевски изјави дека не ги знае аргументите и доказите за разрешувањата во партијата кои се случија изминатите денови кога високи државни и партиски функционери беа исклучени од партијата по изгласувањето за потребата од уставни промени за кое гласаа и пратеници од ВМРО-ДПМНЕ.
Груевски рече дека посакува силно, обединето ВМРО-ДПМНЕ, „кое што ќе го урне ова зло“, бидејќи според него, кога ВМРО-ДПМНЕ е силно, силна е и Македонија.
„Добив покана, но не можев да одам на прославата на ВМРО-ДПМНЕ“, изјави поранешниот премиер Груевски.
А. Петровска
