„Мислам дека најголемиот страв или најголемата закана доаѓа од Русија, од земји како Унгарија, но пред сè од Русија и Србија. Би рекол дека Унгарија е само трето тркало тука, но Русија и Србија се гледаат како најголемите закани“, вели политичкиот аналитичар од БиХ, Харун Церо за ЦИВИЛ Медиа.
Церо, кој долго време работел и како новинар во Ал Џезира, истакна дека медиумите, барем независните си ја вршат работата, но прашањето е кој навистина ги слуша.
„Медиумите, барем оние делови од медиумите што се слободни, всушност ја вршат својата работа. Знам колку е тешка таа работа, но тие си ја вршат – известуваат за овие прашања, се обидуваат да ги разберат работите, навистина се ангажирани кога станува збор за оваа тема. Но, второто прашање е за важноста на медиумите – кој навистина слуша и кој навистина ги зема предвид нивните извештаи. Исто така и граѓанското општество – има многу дискусии, панели, политички анализи итн. Она што недостасува се протестите, особено од младите.
Имавме протести каде што најголем дел од учесниците беа од постарата генерација, делови од постарата генерација кои на некој начин… имате чувство дека младите се повеќе фокусирани на себе, на своите кариери, на тоа како да ја напуштат земјата – одливот на мозоци е исто така огромен проблем, а нема речиси никаква циркулација на млади луѓе, вели Церо.
Иако свесноста за заканата од Русија и Србија е присутна, сепак работите БиХ треба да ги преземе во свои раце, а не да се препушти само на меѓународата заедница, смета Церо.
„Мислам дека сите се свесни за заканата што доаѓа од Русија или Србија. Ако сега направиме погрешен чекор во смисла на тоа да ги пуштиме работите и целосно да им ги препуштиме на меѓународната заедница – која во моментов не знае што да прави или не е премногу заинтересирана да преземе нешто, особено Европската Унија – да видиме што ќе направат САД. Мислам дека тогаш можеби сме ја изгубиле играта и работите ќе станат многу потешки после тоа – и политички и безбедносно“, додава тој.
Разговорот го водеше: Џабир Дерала
Обработка: Биљана Јордановска
Камера и монтажа: Ариан Мехмети
