За настаните од 27 април одговорност мора да има, но одговорноста не смее да се генерализира, мора да се почитуваат човековите права и презумпцијата на невиност, и да се внимава на квалификациите на кривичните дела, изјави претседателот на Република Македонија Ѓорѓе Иванов во своето обраќање до јавноста на 28.11.2017 во 19:15 часот.
„Ја поддржував и сега ја поддржувам граѓанската иницијатива „За заедничка Македонија“ која повеќе од два и пол месеци, на мирен и достоинствен начин ја искажуваше грижата за националните интереси на Република Македонија. Граѓаните кои се сплотија и ја демонстрираа идејата за заедништво не се и не можат да бидат третирани како терористичка организација“ – рече Иванов.
Тој изрази загриженост за политичкиот реваншизам, од јавната администрација, до судско-полициските случаи, со што, според него, „се внесува страв и несигурност што доведува до состојба на тензии и политичка дестабилизација“.
„Во услови кога не очекува исполнување на многу преземени обврски за консолидација на општеството, како и на планот на евро-атлантската интеграција, целата енергија треба да е фокусирана кон градење консензус за национален дијалог и исполнување на реформите“ – рече тој и повтори дека со реваншизам и демонстрација на сила, се генерира поларизација на општеството, состојба во која, како што рече, „не можеме да очекуваме напредок во реформските процеси“.
Иванов повика на разумно и одговорно однесување на сите надлежни институции кои мора да ги почитуваат Уставот и законите на Република Македонија и рече дека секој е одговорен за своите постапки и свесен за последиците кои произлегуваат од нив: „Граѓаните на Република Македонија очекуваат решенија, а не проблеми. Граѓаните очекуваат поголема благосостојба и просперитет. Сите политички субјекти треба да служат за остварување на тие интереси на граѓаните.“
Иванов оцени дека „нема ништо потрагично и поопасно од меѓумакедонскиот судир“. „Секогаш кога сме биле поделени, други нѐ окупирале, раселувале, преименувале и однародувале, заклучи Иванов.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
