Во Меморијалниот центар во Поточари, покрај Сребреница, денеска ќе се одржи комеморација во спомен на преку 8.000 жртви, кои настрадаа во масакрот за време на војната во Босна и Херцеговина, пред 22 години.
Во Поточари сè е подготвено за почеток на колективна молитва и погребување на новоидентификуваните жртви во масакрот. Ова го потврди и поранешниот началник на Сребреница, Ќамил Дураковиќ, актуелен претседател на Организацискиот одбор за одбележување на годишнината од злосторството. Во Поточари се очекува да пристигнат преку 25 илјади граѓани од целиот свет.
Во културниот центар „Сребреница“ вчера се одржа комеморативна седница за бошњачките и српските жртви, а во Белград истовремено се одржаа два протеста по повод масакрот врз илјадници босански муслимани во Сребреница. На протестот на „Организацијата исчезнати Срби“ беше презентиран список на Срби, убиени во околината на Сребреница. Другиот протест беше организиран од активистите на „Жени во црно“, што е впрочем, една од неколкуте организации во Србија, што инсистира да се признае геноцидот во Сребреница. Српската полиција била принудена да го подели главниот плоштад во Белград, за да спречи судири меѓу двете групи.
Српскиот претседател, Александар Вучиќ во интервју за ТВ Хепи, изјави дека не добил покана за присуство на комеморацијата.
„Такво големо злосторство не смее да му се случи повторно на ниту еден народ, никому. Се пролеа многу крв, мора да гледаме во иднината“, рече Вучиќ, додавајќи дека 80 или 90% од граѓаните на Србија, сметаат дека во Сребреница не се случи страшно злосторство.
И Македонија денеска ќе ја обележи 22 годишнината од геноцидот врз Бошњаците. Босанската културна заедница на Република Македонија ќе одржи „Марш на мирот за Сребреница“, што ќе започне од Мурат пашината џамија во скопската Стара чаршија. За време на маршот ќе биде прочитана годинешната порака на здружението по повод одбележувањето на геноцидот.
Минатиот месец, Судот во Хаг ја потврди пресудата на граѓанскиот суд од 2014 година, според која Холандија е делумно одговорна за смртта на околу 300 босански муслимани од Сребреница, што биле засолнети во базата на мировните сили на Обединетите нации. Судот заклучил дека Холандија постапила противправно, со тоа што ги избркала муслиманите од базата и дека мировниците требало да знаат дека постои реален ризик, тие да се соочат со нечовечки постапки и ликвидација, ако бидат предадени на вооружените сили на босанските Срби.