Пишува: Амб. ЛАРИСА ДИР
Вонредна и Ополномоштена Амбасадорка на Украина во Република Северна Македонија
На 5 ноември 2024 година, Првиот комитет на Генералното собрание на Обединетите нации усвои резолуција за имплементација на Конвенцијата за забрана на развојот, производството, складирањето, употребата на хемиско оружје и неговото уништување.
Меѓу другото, Генералното собрание потсетува дека параграфот 5 од член 1 од Конвенцијата за забрана на развојот, производството, складирањето, употребата на хемиско оружје и неговото уништување ја обврзува секоја држава-учесничка да не користи хемиски супстанции како средства за справување со масовни немири како метод на водење војна.
Во овој контекст, изразена е сериозна загриженост за обвинувањата за нивна употреба од страна на Руската Федерација во нејзината освојувачка војна против Украина.
Организацијата за забрана на хемиско оружје е повикана внимателно да ја следи ситуацијата и да биде подготвена да го истражи ова прашање.
Од 25 до 29 ноември 2024 година во Хаг, Кралство Холандија, ќе се одржи 29-та сесија на Конференцијата на државите-учеснички во Конвенцијата за забрана на развојот, производството, складирањето, употребата на хемиско оружје и неговото уништување.
За време на Конференцијата, ќе се одржи гласање за избор на членови на Извршниот совет на Организацијата за забрана на хемиско оружје за периодот 2025-2027 година.
Од Источноевропската група, свои кандидатури поднесоа Република Северна Македонија, Чешката Република, како и државата-агресор Русија (три кандидати за две места во Извршниот совет).
Според информациите на Министерството за одбрана на Украина, од февруари 2023 до октомври 2024 година се регистрирани и документирани повеќе од 4.300 случаи на употреба на муниција од страна на Русија која содржи опасни хемиски супстанции, вклучувајќи хлорпикрин и други борбени отровни супстанции, со што се прекршува Конвенцијата за забрана на хемиско оружје.
Русија мора да биде повикана на одговорност преку инструментите на Организацијата за забрана на хемиско оружје за употреба на хемиски средства за справување со немири како метод за водење војна против Безбедносните и Одбранбените Сили на Украина, а не да биде избрана во Извршниот совет на оваа организација.
Државата (Русија), која ги прекршува конвенциските норми на меѓународната организација, треба да биде лишена од правото да учествува во работата на нејзините раководни тела.
Специјално за ЦивилМедиа. Дозволено за преземање, според лиценцата Creative Commons.
