Сé уште има можност да се одржат локални избори наскоро, иако на полноќ измина законскиот рок за распишување редовни локални избори, кои согласно со законската регулатива, треба да се одржат без одлагање, порачуваат од Држaвната изборна комисија.
„Рокот за локални избори измина. Понатаму сѐ е во надлежност на Собранието, коешто може да го смени Законот за локални избори, а ние да гo спроведеме“, вели Љупка Гугуческа, портпарол на Државната изборна комисија.
Taa уверува дека Избирачкиот список постојано се ажурира, вели дека нема проблем за граѓаните, чии записи беа спорни за време на предвремените парламентарни избори, да бидат запишани во Избирачкиот список.
„Што се однесува до онаа група граѓани со спорни записи, доколку ги исполнуваат условите да бидат запишани според сегашните законски одредби, што значи да имаат валиден документ за лична идентификација, да се полнолетни и да имаат живеалиште на територијата на Република Македонија, тогаш ќе бидат запишани во Избирачкиот список“, вели Гугуческа.
Иако вети, таа не даде одговор, дали ДИК воопшто ги разгледа претставките, што екипа на ЦИВИЛ-Центар за слобода и пред камерите ги достави во архивата на ДИК. Од моментот кога врз основа на Договорот од Пржино, беше договорена ревизија на Избирачкиот список, бројни граѓани се јавуваа и лично доаѓаа во ЦИВИЛ, да го изразат своето незадоволство и да побараат помош за остварување на своето гласачко право. Меѓу нив беа граѓани кои со ист идентитет беа евидентирани на две адреси во Избирачкиот список, потоа, граѓани кои имаа виртуелни состанари, поточнo, т.н. „фантоми“ во нивните домови. Многу гласачи тврдеа дека не можат да се пронајдат во списокот, а наспроти нив, реагираа други кои посочуваа дека починаtи лица сé уште се дел од Избирачкиот список, а vo нивно име гласаат други лица.
На ова, впрочем, посочи и тогашната министерка за труд и социјална политика, Фросина Ташевска Ременски, врз основа на извршени инспекциски контроли во неколку рурални и урбани средини, за лица кои што се починати, а сé уште се корисници на социјална помош.
ЦИВИЛ во многу наврати и тогаш, но и во овој постизборен период, инсистираше да добие комплетни информации и одговор на многу отворени прашања во врска со изборниот процес и со Избирачкиот список од претседаелот на ДИК, Александар Чичаковски. Но, по секое ветување, следеше игнорирање на телефонските повици и пораки.
Моника Талеска