„Потребна ни е временска рамка и јасен план и мислам дека 2030 година е реален датум за завршување на реформите и на ЕУ и на земјите кандидати кои се во процес. Во спротивно, ако остане како што ветија во Солун, тогаш ќе имаме големо разочарување. Имаме недвосмислен сигнал за проширување на ЕУ и мора да ја искористиме таа можност и да не се блокираме самите, чекајќи подобри времиња“ рече вицепремиерот за европски прашања Бојан Маричиќ во интервју за грчкиот весник „То Понтики“.
Тој додаде дека објавувањето на 2030 како временска рамка е сериозна пресвртница во политиката на проширување на ЕУ и добар план, со кој стратегијата за брз влез во ЕУ добива уште повеќе сила, бидејќи дава до знаење дека чекањето не е стратегија за членство, туку стратегија што ќе ја испразни државата од младите и ќе ја убие надежта за ЕУ.
„Новата ера во односите меѓу Западен Балкан и Европската Унија е доказ за взаемната посветеност на заедничката иднина. Тоа е поглавје дефинирано со верувањето дека со заедничка работа, можеме да изградиме попросперитетна, стабилна и обединета Европа. Западен Балкан не е само на прагот на ЕУ, туку е составен дел на визијата на ЕУ за силен и обединет континент“ рече Маричиќ.
Вицепремиерот во интервјуто за грчкиот весник истакнвуа дека постои доволен сигнал дека работите во ЕУ се менуваат на подобро, поповолни за нас и штом ќе ги завршиме нашите обврски, ќе се најдеме во групата на следните членки на ЕУ.
Северна Македонија е блиска до европското семејство географски, социолошки, политички и демократски
„Северна Македонија е неспорно блиска до европското семејство на повеќе фронтови – географски, социолошки, политички и демократски. Ова чувство е длабоко вкоренето во срцата и умот на нашите граѓани, бидејќи тие отсекогаш се чувствувале како составен дел од европското семејство“ рече вицепремиерот за европски прашања Бојан Маричиќ.
Тој објасни дека географски, нашата земја е во срцето на Европа, поврзувајќи различни региони и култури и оваа географска блискост поттикнала богата таписерија на социјални и културни врски со нашите европски соседи.
„Политички, Северна Македонија покажа силна посветеност на демократските принципи, владеењето на правото и европската интеграција. Активно ги продолживме неопходните реформи за усогласување на нашите институции со стандардите на ЕУ, постигнувајќи значителен напредок во областите како што се реформите во судството, антикорупциските мерки и слободата на медиумите. Овие напори ја одразуваат нашата решеност да ги исполниме критериумите за членство во ЕУ“ рече Маричиќ.
Вицепремиерот за грчкиот весник изјави дека издржливоста на нашите граѓани во залагањето за интеграција во ЕУ доволно зборува за нивната желба да бидат дел од европското семејство.
„Нивната непоколеблива поддршка за пристапувањето во ЕУ означува заедничка визија за просперитетна, стабилна и обединета Европа. Македонците ја гледаат ЕУ не само како институција, туку и заедница на нации што ги одразува нивните сопствени вредности и аспирации“ рече Маричиќ.