Меџити ќе ги вработи Албанците во администрација за да не емигрираат, Минчев го замоли да не живее во бајка; Македонските трговски фирми – меѓу најпрофитабилните во регионот; НАТО ги демантира гласините за повлекување на американските војници од Косово

Фото: ВИ/А.М.ФотоВЕСТ НА ДЕНОТ

Министерот Минчев го замолува вицепремиерот Меџити да не се однесува како „Алиса во Земјата на чудата“

Првиот заменик-претседател на Владата на Северна Македонија и претседател на Демократското движење, Изет Меџити, даде силно ветување за вработување на Албанците во државната и јавната администрација. На партискиот настан по повод основањето на огранокот на Демократското движење во Шуто Оризари, Меџити истакна дека за една година Владата ќе реализира повеќе вработувања отколку што се направени во двата претходни мандати од другите албански политички субјекти.

„За прашањето на вработувањата, за една година ќе направиме онолку вработувања колку што тие направија за два мандати, осум години во Владата. Значи, ќе бидат стотици, ако не и 2-3 илјади Албанци во државната и јавната администрација и насекаде каде што има потреба од обновување на тие работни места, со што ќе се елиминира една пречка и проблем на нашите граѓани, за да не заминуваат во странство и да не ја гледаат својата перспектива надвор од државата“, изјави Меџити.

Изјавата на вицепремиерот Меџити на партиски настан за масовни вработувања во јавната администрација во период од една година е класичен пример на предизборен популизам, без никаква правна или институционална основа, реагира министерот за јавна администрација, Горан Минчев.

„Би го замолил г-динот Меџити да не се однесува како Алиса во Земјата на чудата, ветувајќи нешто што ниту е реално, ниту е возможно без кршење на законските процедури и принципите на доброто управување. Политиката на популистички вработувања не само што би го нарушила интегритетот на администрацијата, туку и би ги загрозила реформите кои имаат за цел создавање ефикасна, професионална и деполитизирана јавна администрација. Јавниот сектор не е предизборен пазар каде што се раздаваат работни места во замена за политичка поддршка“, вели Минчев.

ИЗЈАВА НА ДЕНОТ

Антикорупциска: Патувањето на сопругата на Гаши во Вашингтон и вработувањето на сестрата на Љутков е законско

Патувањето на сопругата на собранискиот спикер, Африм Гаши во Вашингтон со пари од буџетот на Собранието и вработувањето на сестрата на министерот за култура, Зоран Љутков во Народниот музеј во Велес за Државната комисија за спречување на корупцијата е законско. Ова беа само дел од одлуките на Комисијата која на денешната седница реферираше многу предмети, а за речиси сите се прогласи за ненадлежна или ги затвори.

РЕГИОН

НАТО ги демантира гласините за повлекување на американските војници од Косово; Руте нагласува дека стабилноста во Косово е во интерес на сите во алијансата

КФОР ги демантираше информациите за можно повлекување на американските војници од Косово. Од друга страна, НАТО соопшти дека САД остануваат целосно ангажирани во Алијансата со клучна улога во мировната мисија на Косово.

СВЕТ

(ВИДЕО) Зеленски по средбата со Келог: На Украина и требаат „сигурни и јасни“ безбедносни гаранции за да се стави крај на војната

Украинскиот претседател Володимир Зеленски разговараше за ефективни безбедносни гаранции и враќање на затворениците за време на состанокот со специјалниот пратеник на САД за Украина и Русија, Кит Келог. Украина, исто така, го предложи најбрзиот и најконструктивниот пат кон постигнување траен мир.

ФОРУМ

ПРАШАЊЕ НА ДЕНОТ: Каква иднина има нашата земја на меѓународен план?

ПРОПАГАНДА

Проруски тролови го критикуваат ЦИВИЛ за УСАИД – еве го одговорот

Проруските ботови секојдневно дежураат на Фејсбук страницата на ЦИВИЛ / ЦивилМедиа, и неуморно тролаат под секоја објава, без оглед на темата. Коментарите се едни исти, придружени со вулгарен вокабулар, а кои се однесуваат на замрзнатата американска помош и запирањето на средствата на УСАИД, во кои тие го вклучуваат и ЦИВИЛ – Центар за слобода. Ова се фактите:

Јавноста знае дека ЦИВИЛ – Центар за слобода не е корисник на грантови од УСАИД и не е засегнат со развојот на ситуација поврзана со средства од американската помош.

Од самото основање, пред 25 години, организацијата е на мета на разно-разни тролови, на кои им пречи борбата на ЦИВИЛ за демократија и човекови права. Тие, со секоја промена на власта го „палеа“, „стрелаа“ и „затвораа“ ЦИВИЛ, му ставаа катанци на врата, а на бројните членови и поддржувачи им упатуваа закани.

Како што не им успеа да го замолчат ЦИВИЛ во предходните 25 години, колку и да се трудат, тоа нема да им успее ниту во наредните 25 години, а ни потоа.

СЛОБОДНА ЗОНА

„Во листата на најдоходовни фирми на земјава трговците на мало се држат одлично, дури и многу подобро од фирми што нашата свест ги прима како гиганти! Истите тие можат да се натпреваруваат и во регионални рамки. Македонските и хрватските трговци се пример за доходовност по вработен што е еден значаен индикатор. Таа моќ не може, а да не се рефлектира и по нивната позиција во однос на извршната власт, што создава сериозна криза во областа на економско-социјалните односи“, пишува Љубомир Костовски во анализата „БЛЕСКАВИОТ КАМЕН ВО КРУНАТА НА ПРОФИТЕРИТЕ: Македонските трговски фирми – меѓу најпрофитабилните во регионот“.

Д. Муратов