Енергетското поврзување на двете земји со кое Србија би добила уште еден крак за снабдување со природен гас преку изградбата на интерконекторот меѓу Македонија и Грција, покрај брзата железница и взаемна поддршка за евроинтегративниот процес беа главните теми на разговорите меѓу премиерот Христијан Мицкоски и српскиот премиер Милош Вучевиќ, денеска во Скопје.
Како транзитна држава ќе обезбедиме дополнителна опција на Централна Европа за снабдување со гасот. Очекувам во текот на зимата, Украина да влече големи количества гас, што ќе ја зголеми цената и затоа развиваме вакви проекти, истакна премиерот Мицкоски на денешната заедничка прес-конференција со српскиот колега.
Според премиерот Мицкоски, географската положба на нашата земја е многу значајна и сакаме таа да биде патна, енергетска и железничка крстосница, а целта на двете држави е сериозно енергетско поврзување и осамостојување.
Со премиерот Вучевиќ зборувавме за енергетското поврзување на двете земји, преку изградбата на гасниот интерконектор кој ќе ги поврзува двете земји. Ние сме сега во фаза на завршување на тендерска постапка со којашто конечно ќе отпочне изградбата на интерконекторот со нашиот јужен сосед, а со тоа ќе обезбедиме дополнителна опција за снабдување на гас на Централна Европа. Овој интерконектор со нашиот северен сосед е исклучително значаен. Во фаза сме да го пуштиме во употреба и продуктоводот, во јавноста познат како нафтовод којшто ја поврзува нашата земја со нашиот јужен сосед. Цениме дека тоа би било добра опција, да истиот тој продуктовод или нафтовод биде поврзан и со нашиот северен сосед и на тој начин да обезбедиме уште еден коридор. Очекуваме до крајот на годината да ја завршиме постапката и на пролет да почнеме да градиме. Финансирањето е обезбедено, кажа премиерот Мицкоски.
Додека во обраќањето на Мицкоски беше видливо дека на секој начин се труди да ја избегне употребата на уставното име на земјава, според српскиот премиер Милош Вучевиќ, многу значајно решение е изградбата на интерконекторот, што ќе претставува нов пат за снабдување од Грција кон Македонија и Србија.
-Ќе разговараме и за изградбата на нафтоводот, фактот е дека нашите две земји трошат многу струја и треба да се стремиме кон декарбонизација без да ја загрозиме енергетската стабилност, не само за нашите две земји туку и за регионот. На овој начин ќе им обезбедиме стабилност и на стопанствата и на домаќинствата на двете држави – додаде Вучевиќ.
Меморандумот меѓу Северна Македонија и Србија потпишан денеска се однесува токму на соработка во делот на енергетиката.
„Многу сме горди на проектот `Турски ток, јужен ток`, наречете го како сакате. Да го нема тој проект и да не го изградивме Србија сега би немала приоред гас. Да бидеме прецизни и искрени – ни не се откажуваме од кој било гас, сакаме и руски и азербејџански, сите извори. Да се откажуваме од нечиј гас зашто некој друг така проценува, но извинете, ние водиме сметка за нашиот дом“, рече Вучевиќ.
Двајцата премиери разговарале и за брзата пруга од Коридорот 10, која претставува стратешки приоритет како и Коридорот 8.
-За нас е важна одлуката на македонската Влада за Коридорот 10, како стратешки правец за железничкиот транспорт, што е единствена прилика заедно со европските партнери да се поврземе од Виена до Атина, полесно ќе се поврземе со грчките пристаништа. Ова е природен пат меѓу Азија до Европа, а патот ќе оди преку Македонија и Србија, што ќе обезбеди подобар карго и патнички транспорт – рече српскиот премиер Вучевиќ.
И додека за брзата железница и за енергетиката се зборуваше многу на прес-конференцијата на двата премиери, за ЕУ-интеграциите со отстапи малку време, а денешните пораки на таа тема на двајцата премиери се сведоа на веќе видени, безмалку на ниво на фрази.
