Можеби спора, слаба и изнемоштена но правдата сепак успеа со последните сили да стаса до нас а ние и таква со радост ја пречекавме, пишува на својот Фејсбук профил актерот Стефан Петровски и сопственик на кафе барот „Гарсон“ во центарот на Скопје, по ослободителната пресуда на неговиот татко, Бранислав Петровски кој иако беше претепан и му беше скршен черепот, добил приватна кривична тужба од истиот бизнисмен кој претходно на суд го призна тепањето.
-Денес во Кривичниот суд Скопје беше изречена ослободителна пресуда за татко ми кој беше пред четири години крвнички претепан од Спиро Чорогунов. Да потсетам, Спиро е директор на Караорман АД, Сваровски, хотелите Александар и уште неколку бизниси. Спиро го претепа татко ми на 18-ти мај 2019 поради рекламна табла но на тој настан предходеа уценувања од негова страна да му го отстапиме нашиот семеен бизнис.Откако одбивме тој најде причина да предизвика физички контакт и веднаш на суд ја призна вината, пишува Петровски.
Тој појаснува дека бизнисменот добил три години условна казна во замена со една година затвор но по две години извадил лекарско уверение и со тој доказ поднел приватна кривична тужба која денес ја доби својата завршница.
-Иако казната за криминалецот е премала, голготата по која може филм да се снима конечно заврши. Ова го пишувам за да ги известам сите оние кои се грижеа и ме подржуваа во се, БЕСКРАЈНО БЛАГОДАРАМ, солзи ми капат додека го пишувам текстов, фала ви за сите споделувања, протести, поддршки. Вашата поддршка беше најважна во сите тешки моменти од оваа борба, преголема благодарност морам да упатам до Civil MK, Хелсиншки комитет за човекови права – Helsinki Committee for Human Rights, Investigative Reporting Lab Macedonia и Радио Слободна Европа кои доаѓаа и вршеа мониторинг на секое рочиште. Благодарност до медиумите Антропол, Фокус, Слободен Печат, Види Вака и многу други кои ги превземаа моите изјави, ми правеа интервјуа и прилози, кои веруваа и стоеа позади мене, воедно и беа мегафон на сите попратни неправди кои ми се случуваа мене и на моето семејство. Мојата приказна е доказ дека заедно сме најсилни, дека треба да си помагаме, затоа што тешко е да се давиш знаејќи дека околу тебе нема никој рака да подаде, вели тој во својот статус.
Брутално претепаниот Петровски во болница, во тешка здравствена состојба, напаѓачот на слобода
