Муратов: За правата на Ромите многу ретко се известува!

„Sukhar rat, можеби првпат слушате како се изговара на ромски – добро вечер.  Ќе кажам само неколку збора на македонски, затоа што многу ретко, речиси никогаш не се обратил некој на ромски јазик на јавен настан, на не-ромски настан“, рече новинарот Дехран Муратов, на мултимедијалниот настан „За слобода на изразувањето“

Ќе продолжам на ромски јазик, затоа што претпоставувам дека на најголемиот дел од публиката ќе му биде интересно да слушнат како звучи ромскиот јазик. За медиумите моите колеги претходно, многу изнакажаа.

Јас денес сум тука да зборувам на ромски, за да слушнат и останатите (не-Роми) како звучи ромскиот јазик. Веќе гледам дека почна публиката да се насмевнува (позитивно)…

Слобода? Дали може да зборуваме за слобода? Видовме дека еден ромски медиум згасна, во останатите ромски медиуми има само музика и ништо друго, нема никаква критична маса, а до кога ќе биде така, самите Роми ќе одлучат. Не-ромските медиуми објавуваат нешто за Ромите, главно кога Амди Бајрам ќе каже некој лапсус, а за правата на Ромите многу ретко се известува. Затоа, треба да се борите(ме) за вашите/нашите права и да бидете(ме) повеќе застапени во медиумите. Ви благодариме!“

На мултимедијалниот настан посветен на слободата на изразувањето и слободата на медиумите, на граѓанското новинарство и на активизмот „За слобода на изразувањето“, што во организација на ЦИВИЛ – Центар за слобода се одржа на 1 јуни, во центарот на Скопје, на присутните им се обратија шестмина новинари, граѓански новинари и активисти.

Томислав Кежаровски на македонски јазик, Арбана Ќерими на албански, Синиша Станковиќ на српски,  Хадис Сулејман на турски, Дехран Муратов на ромски и Ермин Климента на босански јазик, односно секој на својот мајчин јазик, отсликувајќи ја така Македонија како земја на различни етнички заедници, сите заедно проговорија за медиумскиот простор во земјава, за човековото право на слободно изразување, за потребата да се искаже јавно својот став, за недостатокот на објективно известување и за извртената реалност која секојдневно се пласира во медиумскиот простор.

Мултимедијалниот настан „За слобода на изразувањето“ е во рамките на проектот Граѓански објектив, финансиран од National Endowment for Democracy.