Македонскиот центар за култура и развој (МЦКР), денеска требаше да го презентира Завршниот извештај за набљудување на предвремените парламентарни избори, но не дојдоа претставници на медиумите во закажаниот термин. Според претседателот на МЦКР Нелко Нелковски, мониторингот на МЦКР бил фокусиран на превенција од насилство. Според извештајот МЦКР, пак, изборите на 11 декекмври 2016, ги одбележаа три карактеристики: мирен изборен ден, мирна изборна кампања и мирен постизборен период.
На прашањето на новинарката на ЦИВИЛ Медиа, за оценка на настаните што се случуваа пред Државната изборна комисија, додека се разгледуваа приговорите поднесени од политичките партии, каде јавноста беше сведок на повици за поделби и етнички тензии, за насилство, за „ноќ на долги ножеви“.., за претседателот на МЦКР Нелко Нелковски, доволно е што „не падна ни капка крв и што немало мртви“.
„Вистина е дека имаше остра реторика, се запалија и буриња, но тоа беше за да се стоплат, што беше нормално, со оглед на ниските температури… Се фрлаа петарди, но ние бевме постојано таму и немаше насилство и жртви. Често се прави забуна и се поистоветува човековиот мир, кога нема жртви, и политичкиот мир. Но, ние можеме да заклучиме дека имавме ‘шведски избори’“, изјави Нелковски.
Покрај набљудување на изборниот ден, со по еден набљудувач во секој град, МЦКР остварил и средби во партиските седишта и на митинзите на поголем дел од политичките партии кои учествуваа на изборите. ЦИВИЛ – Центар за слобода, веднаш по изборите во декември, реагираше на извештајот на невладината организација МКЦР, во кој, меѓу другото, се тврди и дека изборите биле „празник на демократијата, спроведени без ниеден инцидент, на сите избирачки места, во сите градови и села на Република Македонија“, што според МКЦР „зборува за созревањето на целата нација“ и го „потврдува развојот на Република Македонија како Изборна Демократија“!
По мониторирањето на изборите, во наредниот период, МЦКР најавува реализација на два нови проекта, „Граѓанска превенција“ и „Здрав спорт за здраво општество“, а како дел од овие проекти е и востановување на акцијата „СВОЗ – Сите во одбрана и заштита“.