Еродирана Македонија по сите шавови, со институции во празнична еуфорија, изминатава недела остана завеана, дури и со отсечена метропола речиси цел ден. Врвот на „успешната“ социјална политика беше бездомникот кој на минус 28 степени го загуби животот, додека социјалните работници го славеа Божик. А, ниту Нова година, ниту свечените литургии за Божик, не ги избришаа обвиненијата на актуелните политичари од владејачката ВМРО-ДПМНЕ.
Календарски, новата страница Македонија ја започна со полни, испишани страници со безброј општествено-политички и економски проблеми. А, граѓаните смрзнати, исплашени дали ќе имаат доволно средства за греење ако продолжи поларната зима, празничното расположени го заменија со неизвесноста околу исходот на политичката криза, по Пржинскиот договор и предвремените парламентарни избори на 11-ти декември.
ДУИ, Беса и Алијанса за Албанците усвоија заедничка Платформа
Усвоена Платформа на партиите на етничките Албанци
По советувањата во Тирана и Приштина, лидерите на партиите на етничките Албанци во Македонија, ја усвоија Платформата којашто е услов за коалицирање со идниот партнер во владата. Свесни дека имаат клучна улога во формирањето на идната коалиција, ДУИ, Алијансата за Албанците и Беса составија 30 барања, а „Платформата е со рок за нивна имплементација. Меѓу нив, постигнување на целосна еднаквост во согласност со Охридскиот договор и Уставот, строга примена на принципот на мултиетничност на Уставот на Република Македонија, каде Албанците се признаени како државотворен народ. Поддршка на секоја законска или уставна иницијатива со која се зајакнува етничката еднаквост на албанското население. Постигнување на целосна јазична еднаквост, употреба на албанскиот јазик на сите нивоа на власта, и обезбедување на неговата употреба како основно и уставно право.Во Уставот да стои ‘македонскиот јазик и неговото кирилско писмо, албанскиот јазик и неговото писмо се службени јазици во Република Македонија’. Сеопфатна дебата за државното знаме, химната и грбот на Република Македонија, со цел државните симболи да ја одразуваат државната мултиетничност и етничката еднаквост. Усвојување на резолуција во Собранието, со која се осудува геноцидот врз албанскиот народ во Македонија во периодот 1912-1956, поддршка на непристрасното работење на Специјалното обвинителство, без етнички и политички предрасуди…“
Овие барања на ДУИ, Беса и Алијансата за Албанците дополнително ги разбрануваа духовите, а политиколозите и аналитичарите се со оценки дека Платформата ја усложнува и така сложената политичка состојба во државата.
Македонската јавност во очекување на нова влада
Иако легитимноста на изборите на 11-ти декември и целиот изборен процес за овие превремени парламентарни избори се многу дискутабилни, со фактот што Државната изборна комисија ги додели мандатите на идните пратеници, а на првата конститутивна седница се и одобрени, исполнети се формално условите за следниот чекор. Со оглед на мнозинството од 51 пратенички мандат, ВМРО-ДПМНЕ, го доби мандататот од претседателот Ѓорге Иванов. Но, останува неизвесно, кои потези ќе ги повлечат партиите следниве 20 дена.
Многу прашања се отворени: дали сите партии на етничките Албанци ќе се согласат да седнат на тркалезна маса со Груевски, кој е обвинет за кривични дела од аферата „Прислушување“ и колку тој е подготвен во име на своето членство да отстапи, ако се имаат предвид жестоките навреди и националистичката реторика за време на изборите, упатена до етничките Албанци во Македонија.
Кочено, дали СДСМ на Зоран Заев, која освои 49 мандати, сега ќе биде новата владејачка партија која ќе ги договара деталите од албанската „Платформа“ или нé чекаат нови избори во септември?
Ванхауте со пораки до македонските пратеници
Меѓународната јавност со препораки да се формира стабилна Влада
Меѓународната јавност будно ја следи состојбата во Македонија. Остануваат препораките да се формира стабилна Влада, којашто ќе ги реализира потпишаните политичи договори, земјата да продолжи по патот на реформи за враќање на владеењето на правото, на слободата на медиумите, за враќање на демократијата…
А, белгискиот дипломат Питер Ванхауте на македонските парламентарци им порача да изберат спикер на парламентот, без да чекаат нова Влада. Спикер кој ќе биде „среќно решение за сите парламентарни партии“. Тој му порача и на претседателот Ѓорге Иванов, да му го довери мандатот за нова влада, на кандидат за кој верува дека нема да ја „доуништи македонската демократија и кој, меѓу другото, ќе се залага за доследна работа на Специјалното јавно обвинителство, и независно македонското судство во целина.
Моника Талеска
