„Каков ќе биде Избирачкиот список, ќе видиме на денот на изборите. Досега не е вратена довербата на граѓаните во Избирачкиот список. А, моите колеги во ДИК, треба да сфатат дека, имаат услови за работа, како никогаш досега“, оцени адвокатот, Александар Новаковски, член на Експертскиот борд на ЦИВИЛ и поранешен претседател на Државната изборна комисија (ДИК), на денешната конференција „Слободни избори за слободно општество“, што во организација на ЦИВИЛ – Центар за слобода денеска се одржа во Клубот на новинарите во Скопје.
„Нашите препораки со ЦИВИЛ од последните предвремени парламентарни избори, може да се прочитаат во извештајот на ОБСЕ. На овие избори, ДИК треба да овозможи брзо објавување на резултатите и да не се доведува во ситуација, како на последните избори, за да нема простор за притисок на политичките партии врз ДИК. Секако ќе има приговори коишто ќе се издржани, но се знае кога тие се разгледуваат“, оценува Новаковски.
„Препораките на ОБСЕ и ОДИХР, не се исполнети ни 20 отсто, пред овие локални избори. Зборуваме за враќање на довербата. Но, ќе ја вратиме, не само доколку изборите поминат технички добро и ако се мирни, оти срамота е по толку изборни процеси, да се говори за мирни избори… Владата направи голем напор да ја бајпасира недовербата. Сите државни службеници се вклучени во изборниот процес. Но, битно е како ќе се однесуваат партиите. Но, за да имаме фер, слободни и демократски избори, државата треба да ги исполни условите. Треба да има поделба на власта, треба независните институции да профункционираат“, порача Новаковски.
Тој изрази очекувања дека по изборите, секоја институциија ќе си ја преземе обврската и ќе ги спроведе препораките на ОБСЕ и ОДИХР.
„Имаме повреда на Копенхашките критериуми, а за да бидат овие избори фер и демократски, треба да се исполат сите предуслови“, рече Новаковски.
Моника Талеска
Фото: Биљана Јордановска
Камера: Атанас Петровски и Дехран Муратов
Монтажа: Ермин Климента