Од извештаите на мониторинг тимот на ЦИВИЛ во врска со нерегуларностите во изборниот процес, очигледно е дека активни во поттикнувањето на изборни нерегуларности се партиските претставници и нивните активисти.
Ова категорија во различни облици придонесуваше кон вршењето на изборни нерегуларности, вклучувајќи: кршење на изборниот молк, поткуп на гласачи, закани и притисоци, нарушување на тајноста на гласањето, опструкции на работата на набљудувачите и сл.
За нарушување на изборниот молк, ЦИВИЛ доби десетици пријави, како од социјалните мрежи, така и од терен.
Што се однесува на нарушување на изборниот молк на социјалните мрежи, го издвојуваме пријавениот случај од наш набљудувач, а се однесува на носителот на листата за советници во Општина Бутел, од партијата на Алијанса за Албанците. Тој на 14 октомври, на својот фејсбук профил, стави слика каде што ги повикува сите да гласат за број 9.
Од друга страна, во општина Аеродром, на булеварот Авној влез 46, ни стигна пријава од граѓанин дека во тој влез, а веројатно и во околните згради, во поштенските сандачиња, се оставени летоци на ВМРО-ДПМНЕ во кои пишува “Новата ера почнува, ново утро, нови победи, со почит и верба во вас, Никола Груевски“.
Исто така, на адресата на ЦИВИЛ беа пријавени случаи кои се поврзани и со поткуп на гласачи. Набљудувачка на ЦИВИЛ извести за случај во општина Шуто Оризари, О.У. “Браќа Рамиз и Хамид“.
Откако две жени го искористиле правото на глас, во дворот на училиштето биле пречекани од едно лице, кое на видно место им поделил по 500 денари.
Изборни нерегуларности, поттикнати од партиски активисти, се регистрирани и во категоријата закани и притисоци.
Набљудувачка на ЦИВИЛ, која учествуваше во броењето на гласовите во и.м. 1017/1, во општина Куманово, извести дека пред да започне броењето на гласовите, а откако се затвориле вратите на избирачкото место, двајца активисти на политичката партија Беса, со тропање и заканување барале да учествуваат во броењето на гласовите, по што избирачкиот одбор не можел да даде отпор на притисокот и ги примил внатре.
По ова пријава, ЦИВИЛ случајот го пријави во полиција, од таму имаше итна реакција и едниот набљудувач бил отстранет од и.м., ситуацијата е ставена под контрола.
И на овие избори, нашите набљудувачи забележаа повреда на тајноста на гласањето, која во неколку ситуации беше оневозможена, имено, во и.м. 2447 во општина Сарај, набљудувач од ДУИ гласал на местото на еден гласач, кој се жалел дека не гледа добро!
Во општина Битола, пред О.У. “Ѓорѓи Сугарев“, наш набљудувач бил присутен при опструкција на работата на набљудувачите, односно напад врз други набљудувачи од “Излези да гласаш“, кои фотографирале група луѓе што примиле поткуп за координирање на гласачите. Поткупувачите забележале дека ги сликаат и тргнале по нив, додека набљудувачите трчајќи отишле до полициското комбе. При инцидентот вербално бил нападнат и набљудувачот на ЦИВИЛ, како од прекршителите, така и од набљудувачите на “Излези да гласаш“ во моментот кога се обидел да дознае што се случува и се претставил како набљудувач на ЦИВИЛ. Епилогот на овој инцидент заврши во полициска станица каде биле одведени и напаѓачите и набљудувачите.
Ф.Х.
