Ситуацијата со човековите права во Русија значително се влоши по нејзината инвазија врз Украина во февруари минатата година, се наведува во извештајот на специјалната известувачка на ОН за човекови права, Маријана Кацарова.
Кацарова тврди дека имало „системско задушување“ на граѓанското општество и дека рускиот режим извршил масовни самоволни апсења на критичарите на војната, пишува Ројтерс.
Уапсените се соочуваат со смртни закани поради „постојана употреба на тортура и малтретирање“, се наведува во извештајот на специјалната известувачка.
Ова е првпат Советот за човекови права на ОН, што постои 16 години, да има мандат да ги истражи постапките на една од петте постојани членки на ОН.
Портпаролот на Кремљ, Дмитриј Песков, изјави дека во моментов не може да ги коментира наводите бидејќи се уште не го видел извештајот.
Експертите ги документираа неодамна донесените рестриктивни закони што се користат за „замолчување на граѓанското општество и казнување на активистите за човекови права и другите за нивното антивоено однесување и ставови“, се заклучува во извештајот.
Зачестената насилна примена на овие закони и регулативи, се додава во извештајот, резултираше со систематска репресија врз граѓанските организации и независните медиуми.
Москва претходно соопшти дека нема да соработува со истрагата, а дебата за извештајот ќе се одржи на состанокот на Советот в четврток во Женева.
Г. Т.
