Вечерва во Белград пред Собранието на Србија се одржа уште еден 27-ми по ред протест „Србија против насилството“, а колона граѓани тргна по таканаречената „медиумска рута“ до зградата на РТС. Тоа беше и последен протест во ваков формат, објави N1.
Време е да ја искористиме шансата и да смениме нешто на 17 декември и да покажеме дека ниту една жртва не е залудна, порача модераторот Смиљан Бањац од вечерашниот собир „Србија против насилството“.
Тој рече дека на евентуалната кражба на гласови ќе се реагира како во 1996 и 2000 година, бидејќи „Србија лесно се бунтува и се буди и сака да живее во слобода и мир“.
„Се изборивме за вонредни избори, проевропската опозиција се обедини на една листа. Немојте да го преспиете 17 декември“, им порача Бањац на граѓаните.
Тој додаде дека граѓаните шест месеци споделуваат гнев, тага и страв поради трагедиите што се случија, а се осврна и на масовните убиства во белградското основно училиште „Владислав Рибникар“ и кај Младеновац.
„Исто така, ја споделуваме надежта дека нешто може да се промени на крајот на оваа година. Успеавме да ги ослободиме луѓето од страв, не само во Белград, каде што е вообичаено, туку и на многу места каде што никогаш немало протестни прошетки“, рече Бањац.
Организаторите сметаат дека е потребна поинаква организација и веќе нема да има вакви редовни собири во Белград.
По говорот на модераторот на протестот започна протестен марш кон РЕМ и РТС на чело со голем транспарент „Србија против насилството“, а учесниците кога застанаа пред РЕМ извикуваа „Оставки, оставки“.
Проевропските опозициски партии, кои се организатори на протестите, пред неколку дена потпишаа коалициски договор за заедничко учество на изборите со листата „Србија против насилството“.
Парламентарните и локалните избори се закажани за 17 декември.
Г. Т.
