Владата иницираше постапка за Предлог за пристапување кон уставни измени, кои веќе се пристигнати во Собранието. И покрај започнувањето на постапката за уставни измени неизвесно е дали ќе има доволен број пратеници (80) за нивно носење или ќе се оди на предвремени парламентарни избори.
За многумина во Македонија, но и за претставниците на ЕУ и НАТО предвремени парламентарни избори не се решение за излез од оваа ситуција која настана по референдумот, кога излезноста беше околу 37 отсто, а опозициските пратеници кажаа дека нема да поддржат уставни измени.
Премиерот Зоран Заев денеска изјави дека не може да потврди дали е постигнато двотретинско мнозинство за донесување на уставните измени што се обврска од договорот од Преспа, но изрази оптимизам дека низ инклузивна дебата, како што рече, ќе победи прогресивниот елемент.
„Тоа не може никој да го каже. Тоа може да се каже на моментот на одлучувањето, секако низ дебатата во Парламентот. Јас верувам и ќе видиме сите дали тоа мнозинство постои или не. Нема да дозволиме ништо да се упропасти“, изјави Заев.
„Граѓаните кои одлучија да учествуваат на референдумот, со над 90 проценти дадоа јасен патоказ каде треба да се движи Македонија. Сега работите преминуваат во институциите на системот. Владата вчера ја отвори иницијативата за уставни измени и таа истиот ден беше доставена во Собранието. Очекувам Парламентот денеска или утре да ја почне постапката пред Уставната комисија за отворање на дебатата“, истакна премиерот Зоран Заев на денешната дебата насловена: „Мостови или ѕидови? Македонија и Западниот Балкан во Европа“, организирана во рамки на Форумот за граѓанско општество Скопје 2018.
Еврокомесарот за проширување, Јоханес Хан, во интервју за австриски „Стандард“ вели дека е запознаен со закани од опозицијата против пратеници кои сакаат да ја напуштат партиската линија и да го поддржат Договорот со Грција во Собранието. Тој од ВМРО-ДПМНЕ побара да се откаже од, како што вели, деструктивниот пристап, и интересите на земјата и граѓаните да ги стави пред партиските.
Професорите Далибор Јовановски, Никос Чаусидис, Људмил Спасов, Ана Чупеска-Станишковска, Фахри Рамадани и Кица Колбе се членовите на Заедничкиот интердисциплинарен комитет на експерти (ЗИКЕ) за историски, археолошки и образовни прашања од македонска страна, на чело со амбасадорот Виктор Габер.
Во Кривичниот суд во Скопје денеска продолжи судењето за настаните во Собранието на Република Македонија на 27 април минатата година. На минатото рочиште беа сослушани четворица сведоци, кои ги објаснија нивните дејствија за време на протестите пред Собранието, како и на критичниот 27 април минатата година.
ЦИВИЛ – Центар за слобода најостро го осудува урбанистичкото дивеење во општина Аеродром и изразува силна поддршка на незадоволните граѓанки и граѓани кои за денеска најавија протест.
„Го потсетуваме градоначалникот на општина Аеродром, Златко Марин, дека неговата функција и задача е да биде на страна на граѓан(к)ите и нивните интереси. А интересите на овие граѓан(к)и кои живеат во најзагадената општина во Скопје секако не се новите висококатници, туку чистиот воздух и здравата животна средина“, стои во соопштението на ЦИВИЛ.
А. Петровска