По првиот изборен круг настапи затишје, здивнавме за миг. Едните беа во нокдаун од успехот, а другите беа практично нокаутирани од гласачите. Сепак, кон крајот на минатата недела, кампањите во пресрет на вториот круг повторно се разгореа. Не е важно што сега има само 35 општини во кои се оди на втор круг. И овие локални избори имаат национален карактер, така што, сите сме мета на кампања, без оглед на тоа дали во нашата општина ќе има втор круг или не.
На Груевски, очигледно, многу му се допаѓа алатката референдум. Не му успеа да наметне референдуми против бегалците, па сега повикува на референдум да се оспори договорот за добрососедство со Бугарија. Навистина, тоа беше срамна кампања, со исто таков завршеток. Треба да се запомни дека 14 општини изгласаа референдум против бегалците во време кога во земјата имаше „дури“ 13 бегалци. Свесен е дека и оваа референдумска иницијатива е шум на крилцата на комарец во средиштето на правно-политичкиот ураган кој го зафати него во последниве две години.
Тој е притеснет од извесната екстрадиција на Грујовски и Бошковски од Грција, што ќе го приближи до притворот во Шуто Оризари, но и од другите аспекти на истрагите за неговите криминали. Освен тоа, тој веќе не може да ги лаже ни членовите на партијата која ја држи во својот џеб една и пол деценија. Охрабрени од Реформаторите, членовите на неговата партија го искажуваат незадоволство од него сè помасовно. Груевски сега ги троши последните денови од сопствената (не)моќ и затоа сега му останува само „длабински“ да анализира.
Според изразот на неговото лице, а и на неговите пиони, изгледа дека реалноста веќе со тресок ги отворила вратите на неговата перцепција. Чизмата на фактите гази по нивното лице.
„Ваков поткуп не се случил во Македонија!“ – вели тој во интервјуто со Коле Чашуле на ТВ Алфа, каде што се обидува да ги (до)објасни и „народните стражи“. Тој, всушност, им даде архаично-милитантен назив на граѓанските новинарки и новинари преку кои се открија безброј валканици токму за него и неговиот режим.
Сега веќе станува и донекаде забавно да се гледа како Груевски и неговите лајтнанти говорат за изборни нерегуларности со истиот вокабулар како и анализите и извештаите за изборните кражби кои токму тој ги спроведуваше во изминатите години. Но, некако не му оди. Ни нему, ни на неговите соучесници. Тие малку што му останаа овие денови…
