Руските власти денеска соопштија дека покренале паралелни кривични постапки против познат актер кој ја критикуваше руската војна во Украина и филантроп кој ја поддржува руската опозиција, што се најнови во повеќемесечната пресметка со неистомислениците.
Рускиот истражен комитет соопшти дека неговиот шеф Александар Бастрикин наредил покренување кривична постапка против истакнатиот руски филмски и театарски актер Артур Смолјањинов, кој ја напушти Русија откако нејзините сили ја нападнаа Украина.
Во соопштението се наведува дека Смолјањинов, кој постојано се изјаснувал против војната во Украина, „даде низа изјави насочени против Русија во интервју за западен медиум“. Од истражниот комитет не прецизираат кое од дејствијата на Смолјањинов претставува кривично дело, ниту за што ќе биде обвинет.
Последното интервју на Смолјањинов минатата недела предизвика бурни протести од поддржувачите на Кремљ. Актерот за европската редакција на весникот Нова Газета изјави дека ако мора да војува, ќе се бори „на страната на Украина“.
За мене тоа значи дека би се борел на страната на моите браќа кои беа нападнати од другите мои браќа, рече Смолјањинов.
Истрагата против Смолјањинов е покрената во време на се поостра реторика за Русите кои ја напуштија земјата поради војната.
Пратениците во рускиот Парламент предложија конфискација на имотот на луѓето кои се преселиле во странство или зголемување на даноците за оние кои продолжуваат да работат од далечина за руските компании, додека други едноставно ги осудија како „предавници“.
Против истакнатиот филантроп Борис Зимин, кој беше ставен на меѓународната листа на најбарани лица од страна на Министерството за внатрешни работи на Русија, е покрената втората кривична постапка, врз основа на обвинувања за измама. Зимин ја напушти Русија во 2015 година.
Зимин финансираше неколку независни руски медиуми, како и проектите на опозицискиот лидер Алексеј Навални, кој отслужува повеќегодишна затворска казна. Навални, најжестокиот противник на рускиот претседател Владимир Путин, изјави дека Зимин платил 79.000 евра за неговата медицинска евакуација во Берлин во август 2020 година, кога опозиционерот беше отруен со нервен агенс, поради што падна во кома.
