Се интензивираат преговорите на министерство ниво за решавање на спорот за името по најавите за доаѓањето на шефот на грчката дипломатија Никос Коѕијас во Македонија.
Од македонското Министерство за надворешни работи за МИА соопштија дека Коѕијас ќе дојде во Скопје до крајот на февруари или почетокот на март, а не како што претходно најавија грчките медиуми, во текот на неделава.
Како причина за пролонгирањето на посетата на Скопје се наведуваат згуснатите и веќе претходно договорени агенди на двајцата министри, Никола Димитров и Никос Коѕијас.
Претходно, грчката телевизија „Алфа“ објави дека шефот на грчката дипломатија во следните денови ќе дојде во Скопје. Во прилогот емитуван во централното издание на вестите, новинарката повикувајќи се на свои извори, вели дека започнува клучна недела за преговорите, а Коѕијас на неговиот македонски колега ќе му ја достави нацрт-спогодбата што ја подготвува грчката страна.
Оптимист дека ќе се најде решение до Самитот на НАТО е и македонскиот премиер Зоран Заев, кој во интервју за австриската радиостаница ОРФ, вели дека верува оти успешно ќе завршат преговори до јули. Премиерот нагласува дека влезот на Македонија во НАТО е повеќе од извесен, доколку се пронајде решение за спорот.
– Имаме автоматска покана, што значи дека членките на НАТО ќе почнат со ратификација на нашето пристапување, откако ние и Грција ќе најавиме дека спорот е решен, вели Заев.
Според поранешниот германски амбасадор во САД и сегашен претседавач со Минхенската безбедносна конференција Волфганг Ишингер, патот на Македонија кон ЕУ и НАТО требал одамна да биде одблокиран. – Патот на Скопје кон ЕУ и НАТО треба да се одблокира. Тоа требаше одамна да биде сторено, напиша Ишингер на неговиот твитер профил.
Умерен оптимизам за постигнување решение на името изразува и поранешниот грчки амбасадор во Македонија, Јоргос Какликис, кој во разговор за CNN.GR, се потсетува на периодот кога бил амбасадор во Македонија и моментот кога во 2001 двете земји биле на чекор до решение откако грчката влада покренала иницијатива за разговори во Скопје.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
