Најавената јавна седница на Државната изборна комисија (од денеска за утре), за да расправаат по предлог-одлука за отповикување на донесените одлуки за определување на надоместок за членовите на Државна изборна комисија и вработените во стручната служба за спроведените избори, ја става под знак прашање, легитимноста на која повика амбасадорот на САД, Џес Бејли.
Доколку оваа реакција на ДИК е токму тоа, под притисок, или како што вели во сопштението „поради повикот на јавноста“ членовите на ДИК се одлучија на ваков чекор, во спротивно ќе си останеше само јавна тајна, тогаш еве уште неколку примери во контекст на изјавата на Бејли.
Додека Бејли ја посочува ДИК, како институција чии членови „си изгласале дополнителна плата за четири дополнителни месеци за нивната работа на октомвриските избори“, а претходно истата процедура ја спровеле за изборите во 2016, можеби легално, но зад затворени врати (јавно, ама тајно).
Кога сме веќе кај трошењето на јавните пари во оваа институција, останува отворено и прашањето, дали имало или немало буџет за исплаќање на членовите на избирачките одбори. На пример, според извори на ЦИВИЛ, кои сакаа да останат анонимни, два члена на избирачки одбори на изборите во 2014 година, сѐ уште не се исплатени, а самите тврдат дека не се единствените кои останале без надоместок за завршената работа.
Овие два верификувани случаи се само индикатор за лошото менаџирање со јавните пари во ДИК, а следствено ги потврдуваат наодите и информациите на ЦИВИЛ, не само за изборите во 2014, туку и во 2016 и 2017.
Дека ДИК не е отворена за јавноста, потврдува и барањето на ЦИВИЛ за информации од јавен карактер, што беше одбиено со образложение дека информациите побарани на увид, меѓу кои и за висината на поединечните месечни примања на членовите на Државната изборна комисија, (9-те члена, вклучително и Претседателот и неговиот заменик) за 2016 и 2017 година, не се наш интерес или од интерес на јавноста.
„Побараните информации во барањето не се од јавен карактер и од тие причини истите не можеме да Ви ги доставиме во начин и форма во кои ги побарувате“, беше одговорот на ДИК.
Прашање до институциите, па и до Државната изборна комисија: Потребни ли се меѓународни „укажувачи“ за нешто да се смени во начинот на работење или, во контекст на промените, дали конечно ќе се одважат на транспарентност и одговорност!?
Биљана Јордановска
