Во 25 компании, коишто во Македонија биле отворени од странски инвеститори во период од десет години, со 20.000 вработени, државата од буџетот потрошила преку 225 милиони евра! Поточно, со пари од граѓаните, за еден работник се исплатени и по 11.000 евра од државната каса, стои во податоците од „Анализата на трошоци – наспроти резултатите од странските директни инвестиции во Македонија во периодот 2007 – мај 2017“, направена по одлуката на Владата на Зоран Заев, за декласификација на договорите потпишани од поранешната влада. Според портпаролот на Владата, Миле Бошњаковски, договорите со инвеститорите биле правени „во четири очи“ и без критериуми.
„Агенцијата за странски инвестиции, ТИРЗ и министрите без ресор, потрошиле кеш-пари во неповратни грантови во износ од 26 милиони евра. Околу 14 милиони евра добиле странските инвеститори за креирање работни места, некои добивале илјада евра по работно место, а некои по 11.000 евра! На име обуки, исплатени се 5 милиони евра, повторно без критериуми, некои добиле 100 евра по работник, а некои 3.000 евра. За градежни работи, странските инвеститори добиле 10 милиони евра!“, соопшти Бошњаковски, на прес-конференција, истакнувајќи дека инвеститорите добиле и 69 милиони евра како даночни олеснувања.
„Договорите биле склучени во затворен круг, немало документи или критериуми за преговарање, преговарале министри, советници, посредници без критериуми и сите податоци биле тајни. Тајните договори биле склучувани без критериуми, некои добивале повеќе, а некои помалку …“, изјави Бошњаковски.
Но, тој е дециден дека сите овие договори со странските инвеститори се во важност и дека ќе бидат целосно исполнети.
Наспроти овие фрапантни податоци, уште пред да почне пресот на Владата, во медиумите блиски на ВМРО-ДПМНЕ се вртеа изјави на партискиот лидер, кои што упатуваат жестоки критики адресирани до СДСМ, и премиерот Зоран Заев за наводно отворање војна на 100 странски компании и доведување во прашање на 20.000 вработувања. Според Груевски, иако не е тајна, ниту незаконски што Македонија, дава субвенции на странски инвеститори по некаков основ, штетна е одлуката на Владата за декласифицирање и објавување на субвенциите. Овој потег, според Груевски, ќе влијае врз потенцијалните инвеститори и нивните намери да инвестираат во земјава.
„Со оваа нова одлука, Владата ја руши конкурентоста на државата во однос на другите соседни и регионални држави, кои што исто така, се натпреваруваат за инвестиции. Секоја земја прави напори и води преговори со инвеститорите во тој правец. Тоа го прават и Србија, Бугарија, Романија, Чешка, Унгарија, но и одредени држави во САД и други развиени земји, кога сакаат да привлечат голем работодавач. Компаниите кои доаѓаат, не посакуваат јавно објавување на нивните договори и приходи по основ на субвенции, а тоа не и одговара ни на државата. Прво, затоа што се откриваат позициите пред другите земји конкуренти, бидејќи најчесто за еден инвеститор во процесот на одлука се натпреваруваат најмалку 5-6 држави, а некогаш и повеќе, со различни понуди кои најчесто не се објавуваат“, вели Груевски во изјава за „Република“.