Првонаградената сторија за граѓанско новинарство „Државата нема слух за мојот син“ предизвика многу емотивни, но и револтирани реакции во јавноста, а истовремено ги поттикна и институциите да реагираат во решавање на проблемите со кои секојдневно се соочуваат лицата со попреченост.
Виктор Тошевски, ученик во ДМБУЦ Илија Николовски Луј, е вистинска инспирација за неговиот професор, а воедно и добитникот на наградата, Дамјан Темков. На вчерашното доделување на наградите за најуспешните граѓански новинар(к)и Дамјан ја отстапи наградата на Виктор и неговата мајка за нивната храброст и гласност во борбата за подобри услови за живот на сите што се во истата ситуација како нив.
Приказната на Виктор и гестот на неговиот професор, го поттикна и второнаградениот граѓански новинар, кој сакаше да остане анонимен, да ја отстапи својата награда на семејството Тошевски, со надеж дека барем малку ќе му олесни во неговите секојдневни училишни обврски.
Второнаградениот граѓански новинар сметаше дека оваа е позитивен пример кој ја оправдува борбата и заложбите на ЦИВИЛ секогаш во интерес на граѓанките и граѓаните во заштита на нивните човекови права и слободи.
Б.Јордановска
