„Јас на дебатата во Собрание односно на надзорната расправа кажав дека материјалите коишто се одземени, дали се тоа електронски уреди, медицинска документација, во моментот се наоѓаат на вештачење. Вештачењата треба да ги покажат сите аргументи, сите факти, сите докази односно целата таа постапка и на основа на тоа што ќе биде во вештачењата, доказите коишто ќе бидат понудени, секако дека ќе се носи одлука во Јавното Обвинителство. Се водат финансиски истраги за седум лица“, истакна министерот за внатрешни работи Оливер Спасовски на Тема на денот во Дневникот на Сител во однос на случајот Онкологија.
Тој додаде дека тоа не значи дека се осомничени, и посочи дека е свесен дека ова е тема којашто предизвикува внимание во јавноста, меѓутоа е многу важно до крај да се завршат работите и на основа на се што ќе се обезбеди како доказ, да се именуваат тие коишто се виновни во овој случај, да се изведат пред лицето на правдата и секако да се оттргне вината генерално од лекарската фела.
„Нема да говорам ништо повеќе од тоа што сум го кажал на надзорната расправа ниту можам тоа да го правам. Тоа се веќе детали од истрагата и секогаш е најдобро кога истрагата се води од институциите, ако веќе дојде моментот за соопштување во јавноса тоа да го направиме. Инаку апсолутно не е целисходно ние сега да излегуваме во јавност, да шпекулираме, да нагаѓаме и така натаму… тоа само ќе му штети на овој процес“, рече Спасовски.
Тој заклучи дека и министерството и Јавното Обвинителство работат интензивно и дека нивната заедничка цел е најбрзо што може да се завршат сите овие постапки и на крајот да резултираат со очекувањата.