Опозициските партии во Србија денеска до претседателката на Парламентот, Маја Гојковиќ поднесоа барање да се покани набљудувачка мисија на Организацијата за безбедност и соработка на Европа (ОБСЕ) на изборите за градот Белград и на евентуалните вонредни парламентарни избори, јавува МИА.
Барањето го потпишаа Движењето на слободни граѓани на Саша Јанковиќ, од Народната странка на Вук Јеремиќ, Демократската странка на Драган Шутановац, Социјалдемократската странка на Борислав Тадиќ, Новата странка на Зоран Живковиќ, Доста беше на Саша Радуловиќ, Левица на Борислав Стефановиќ, Бели, Само силно и други помали партии.
Во барањето, кое е прво од ваков тип, каде опозицијата здружено и со најголем број партии и движења настапува, од властите се бара да овозможи доѓање на полна мисија на ОБСЕ уште на првиот ден од распишување на изборите, со цел продолжување на заедничката опозициска борба за фер избори, се наведува во соопштенијата на овие партии.
Исто така се посочува дека ако властите ја отфрлат таквата иницијатива на опозициските движења и партиите „ќе имаме јасни докази дека има неконзистентни намери“.
Но, доколку, како што се надеваме, ОБСЕ биде повикано, тоа ќе биде многу важен механизам за контрола на изборниот процес во наредните месеци, но и продолжување на заедничката борба на сите оние кои сакаат слободни и фер избори.
Лидерот на опозиционерската десничарска партија Двери, Бошко Обрадовиќ изјави дека не разбира зошто ОБСЕ е тема на опозицијата, кога таа организација на денот на претседателските избори констатирала дека тие се регуларни, со проблеми во избирачкиот список и на полето на слободата на медиумите.
Обрадовиќ на прес-конференцијата во Парламентот изјави дека вистинска тема на опозицијата е заедно да ја присили Владата да ги среди избирачките списоци и да ги ослободи медиумите.
За ова прашање Двери добија подршка само од Демократската странка на Србија, Здрава Србија и други помали партии, и се уште чека одговор од останатите опозициски партии.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
