Самостојниот синдикат на новинари на Македонија (ССНМ) ја осуди хајката од синхронизирани напади на белградскиот весник „Информер“ врз македонскиот дневен весник „Слободен печат“ што на македонскиот медиумски пазар е етаблиран како балансиран и независен медиум кој не е под влијание на власта.
„Станува збор за хајка којашто промовира политичка, национална и верска нетрпеливост и омраза и со тоа го изложува медиумот и неговите вработени на притисок и вербално насилство. ССНМ останува посветен на борбата за медиуми со независна уредувачката политика, затоа што само во такви редакции воопшто може да се практицира слободно, одговорно и професионално новинарство, коешто е неопходно за деконтаминација на медиумскиот простор, окупиран од пропаганда“, реагира ССНМ.
Редакција на „Слободен печат“вчера се обрати до новинарските здруженија и меѓународните дипломатски претставништва во Скопје, со повик за поддршка за слободното известување и за уредувачката автономија, со тврдење дека весникот бил „жестоко нападнат од печатеното и дигиталното издание на белградскиот весник ‘Информер’ и од пропагандата на Никола Груевски“.
„На насловната страница на белградскиот дневен весник ‘Информер’, познат по ширење национална и верска нетрпеливост и омраза, денеска е објавен текст за наводно спорно финансирање на ‘Слободен печат’. Освен тоа, на насловната страница и во текст објавен во печатеното и во дигиталното издание на весникот, сопственикот на нашата компанија се обвинува дека е предавник, поради слободната уредувачка политика што ја ужива најтиражниот македонски дневен весник ‘Слободен печат’. Истиот текст е преземен од македонските портали ‘Курир’ и ‘Република’, медиуми коиштп се под директна контрола на Никола Груевски, со цел да се дискредитира нашата компанија и да се изврши притисок врз уредништвото на нашиот независен медиум, врз којшто подолго време се врши и сериозен економски притисок. Денешниот напад очигледно е последица на медиумската оска на релација Белград – Скопје, која има за цел гушење на слободата на медиумите, пласирање лажни вести и измислени ‘сценарија’ “, стои меѓу другото во редакциското соопштение потпишано од главниот и одговорен уредник, Бранко Геровски.
М. Талеска
