Предизборно насилство, црна кампања, злоупотреба на администрацијата и јавните ресурси, злоупотреба на децата во кампања, говор на омраза, национализам и верска омраза ја одбележаа изборната кампања во пресрет на првиот круг на гласање за локалните избори.
Кампањата за вториот круг, освен што не започна веднаш по првиот круг, барем не со очекуваниот интензитет, бидејќи политичките партии чекаа резултати од приговорите што ги поднесоа до ДИК, скоро во ништо не се разликуваше.
Кампањата мора да заврши денеска до полноќ, по што почнува изборниот молк кој трае до затворањето на гласачките места во 19 часот, недела.
Во недела, на 29 октомври, право на глас имаат 833.716 гласачи во 35 општини.
Во Боговиње, Брвеница, Бутел, Виница, Врапчиште, Гази Баба, Гостивар, Градско, Дебар, Демир Капија, Пробиштип, Росоман, Долнени, Желино, Зрновци, Јегуновце, Кавадарци, Карбинци, Кисела Вода, Липково, Македонска Каменица, Македонски Брод, Могила, Новаци, Сарај, Старо Нагоричане, Струга, Студеничани, Теарце, Тетово, Чаир, Чашка, Чешиново – Облешево, Штип и Шуто Оризари ќе се гласа за кандидати за градоначалници.
Кандидатите за градоначалници на Беса и ДУИ ќе се судрат во борбата за гласови во Тетово, Желино, Теарце и Липково.
СДСМ и ВМРО-ДПМНЕ својата борба за општина плус ќе ја водат во Штип, Чешиново-Облешево, Старо Нагоричане, Росоман, Пробиштип, Новаци, Кисела Вода, Македонски Брод, Македонска Каменица, Карбинци, Кавадарци, Јегуновце, Зрновци, Демир Капија, Гратско, Гази Баба, Виница и Бутел.
Во вториот круг победник е секој што ќе освои барем еден глас повеќе од својот противник.
СДСМ се бори за 22 општини, од кои во водство од првиот круг е во 14. ВМРО-ДПМНЕ се бори за 19 општини, од кои водство има само во шест од нив. ДУИ се бори за 12 општини, води во 11. БЕСА се бори за седум општини, но нема водство во ниедна. Алијансата за Албанците се бори за пет општини, води во една. ДПА се бори за една општина каде што во првиот круг нивниот кандидат за градоначалник беше во предност, а независни кандидати се борат за две општини.
Ако и по вториот круг од кои било причини не се изврши избор на градоначалник, Државната изборна комисија ја известува Владата на Република Македонија во рок од 15 дена од завршувањето на изборите. Владата ќе именува повереник за вршење на работите од надлежност на градоначалникот во рок од 15 дена, а потоа го известува претседателот на Собранието, да распише нови избори за градоначалник за таа општина.
Што се однесува до гласачите, болните и немоќни лица најдоцна до 21 октомври можеа да ја известат Општинската изборна комисија за гласање во домашни услови. Лицата на издржување мерка куќен притвор, а кои сакаат да гласаат, преку овластен полномошник имаа можност да ја известат ОИК најдоцна три дена пред денот определен за гласање, односно до 25 октомври.
Болните и немоќни лица, гласачите што на денот на гласањето се наоѓаат на издржување на казна затвор или се во притвор, гласачите што на денот на гласањето се наоѓаат на издржување мерка куќен притвор и лицата со статус внатрешно раселени лица гласаат од 07:00 до 19:00 часот, в сабота, на 28 октомври.
На 29 октомври, со почеток во 7 часот наутро, гласаат сите останати граѓанки и граѓани во општините каде има прегласување. Во 19 часот, гласачките места се затвораат, а на гласачите затечени во објектот каде што се гласа им се овозможува да гласаат.
Избирачките места кои нема да се отворат на време, односно во нив има прекини на гласањето, избирачките одбори се должни да го продолжат времето на гласање за онолку време колку што траел прекинот, односно доцнењето. Прекинот на гласањето може да трае најмногу три часа. Доколку трае подолго, на тоа избирачко место треба да се повтори гласањето, седум дена подоцна.
Записниците и другиот изборен материјал, Избирачките одбори ги доставуваат до ОИК во рок од 5 часа по завршувањето на гласањето.
ДИК ги објавува првичните резултати од изборите добиени по електронски пат сукцесивно, а во рок од 12 часа по завршувањето на изборите ги објавува резултатите добиени врз основа на податоците од записниците добиени од ОИК.
Со почеток на изборниот молк, пораките до сите засегнати страни, како и до медиумите е да се воздржат од сите активности со цел да не се влијае на слободната волја на гласачите.
Биљана Јордановска
