На дванаесеттото, финално продолжение на „сапуницата“ околу разврската на „Случајот Зврлевски“, со која треба да започнат реформите за враќање на владеењето на правото во Република Македонија, претседателот на Собранието Талат Џафери му држеше лекција на Илија Димовски (ВМРО-ДПМНЕ), опозицијата ја напушти седницата, мнозинството со 64 гласа „за“ од првично присутните 100 пратеници, конечно успеа да го изгласа разрешувањето на оспоруваниот и обвинуваниот Јавен обвинител Марко Зврлевски, што беше проследено со аплауз од присутните…
Продолжението на осмата собраниската седница за смена на државниот Јавен обвинител Марко Зврлевски започна со обидот на Илија Димовски да, го реактуелизира мислењето на Државната комисија за спречување на корупцијата (ДКСК), која неодамна се изјасни дека оваа расправа е во спротивност со член 8 од Изборниот законик. Според мислењето на ДКСК, јавниот обвинител не може да биде разрешен до локалните избори кои се закажани за 15 октомври, но, претседателот на Собранието го прогласи за ништовно писмото кое пратениците на ВМРО-ДПМНЕ го доставиле до него, бранејќи го ставот дека ДКСК не е надлежна за такво мислење, односно дека толкувањето на законите е во надлежност токму на Собранието. Според Џафери, Антикорупциската комисија нелегално го дала толкувањето, бидејќи тој како претседател на Собранието, ниту Собранието тоа не го побарале од неа, и не може институција која ја избрало Собранието, да врши контрола врз неговото работење. Иако ВМРО-ДПМНЕ, по контроверзното мислење на ДКСК, според кое, во време на распишани избори не смее да се разрешуваат назначени функционери, побара да се прекине расправата. Џафери се повика на членот 64 од Уставот на Република Македонија кој ја санкционира оваа проблематика, по што се пристапи кон гласање во отсуство на опозицијата.
Откако владеачкото мнозинство со 64 гласа „за“ го разреши Зврлевски, Џафери ја прекина седницата.
Освен смената на Зврлевски, денеска уште една одлука го разбранува судството. Судскиот совет на седница затворена за јавност, донесе одлука да им го одзеде имунитетот на петтемина судии, обвинети за злоупотреба на службената положба и овластување во предметот „Титаник 2“ за изборна измама. Иако претседателот на Судскиот совет Зоран Караџовски, не го соопштил идентитетот, медиумите веднаш објавија дека се работи за управните судии Билјана Никодиновска-Петровска, Лидија Ивановска, Благородна Рангелова, Анета Џигерова и Газмент Фејзулаи.
Имунитетот им е одземен, откако кривичната судијка Верка Петковска побарала од Судскиот совет мислење за тоа како да постапи во однос на судискиот имунитет на кој се повикувале петтемина судии, за кои Специјалното јавно обвинителство поднесе обвинение за сторена злоупотреба во случајот „Титаник 2“.
