На денешен ден, пред 16 години светот започна да го одбележува Меѓународниот ден на демократијата, 15 септември. Овој ден се одбележува секоја година низ светот за да се зајакне демократијата и да се истакнат нејзините вредности и принципи.
Темата на Меѓународниот ден на демократијата оваа година е „Зајакнување на следната генерација“. ОН се фокусира на суштинската улога на младите во унапредувањето на демократијата и обезбедувањето дека нивните гласови се вклучени во одлуките кои имаат големо влијание врз нивниот свет. Климатска правда и демократија се дел од таа тема. Ефектите од климатската криза врз животната средина денес е невозможно да се игнорираат, а станува сè поочигледно дека тоа е предизвик за демократијата: растечката несигурност на храна, миграцијата, недостигот на вода и екстремните временски настани предизвикуваат конфликти и им тежат како проблеми на гласачите.
ЦИВИЛ им го честита Меѓународниот ден на демократијата на сите граѓанки и граѓани во земјата и во светот, со повик за почитување на принципите на демократијата секогаш и секаде, и порачува дека декларациите за демократски свет треба час поскоро да се претворат во дела.
Вредностите на слободата, почитувањето на човековите права и принципот на одржување периодични и вистински избори со универзално право на глас се основните елементи на демократијата. За возврат, демократијата обезбедува природно опкружување за заштита и ефективно реализирање на човековите права. Овие вредности се отелотворени во Универзалната декларација за човекови права и понатаму се развиваат во Меѓународниот пакт за граѓански и политички права, меѓународни документи кои опфаќаат мноштво политички права и граѓански слободи кои наметнуваат обврска на државите да ги почитуваат.
Но демократија не значи само право на глас, туку и право на достоинствен живот од секој аспект, право на определба, учество, соработка, еднаквост и почит.
Во овие речиси две години, светот сведочи на уште едно грозоморно и масовно газење и рушење на демократијата и човековите права и територијалниот интегритет со руската воената агресија против Украина. Оваа војна е исклучително болна за демократските вредности на целото човештво.
Истовремено, сиот демократски свет негува надеж дека храбрата украинска нација, со поддршка од сите демократски сили во светот, ќе се ослободи и ќе се издигне повторно.
ЦИВИЛ како организација за човекови права и слободи, со длабоко вкоренети убедувања и дејствување во одбрана и промоција на универзалните човекови права и слободи, и демократските вредности – упатува повик до сите демократски сили во светот да не потклекнуваат пред предизвиците на злото.
Меѓународниот ден на демократијата дава можност да се разгледа состојбата на демократијата во светот и дома. Демократијата е исправена пред жестоки предизвици. Таа е исто толку процес, колку што е и цел. Само со целосно учество и поддршка од граѓанките и граѓаните, како и од институциите, медиумите, граѓанското општество и меѓународната заедница, идеалот за демократија може да се претвори во реалност што ќе ја уживаат сите граѓанки и граѓани низ целиот свет.
Врската помеѓу демократијата и човековите права, меѓу другото, се утврдува и во членот 21 (3) од Универзалната декларација за човекови права, во кој се вели:
„Волјата на народот ќе биде основа на авторитетот на владата; оваа волја ќе биде изразена на периодични и вистински избори што ќе бидат со универзално и рамноправно избирачко право и ќе се одржуваат со тајно гласање или со еквивалентни бесплатни постапки за гласање. “
Честит Меѓународен ден на демократијата!
ЦИВИЛ
