ВЕСТ НА ДЕНОТ: Нема врзани потписи во Влада, Заев ја објасни улогата на првиот вицепремиер
Не се точни информациите дека одлуките ќе се носат со врзани потписи на премиерот Зоран Заев и вицепремиерот Артан Груби. Лично Заев ги демантира и гласините дека за таа цел би се гласале и законски измени. Претседателот на СДСМ и мандатарот за формирање на новата Влада, прецизира дека улогата на првиот вицепремиер ќе биде само да го замени премиерот на состаноци на владата кога тој ќе биде отсутен, или да причека на прием делегација во слични ситуации.
„Се знае дека премиерот потпишува, нема никакви врзани потписи. Секако во идната влада планирам да имам четири вицепремиери, од кои тројца на предлог на СДСМ и еден од ДУИ, кој ќе биде именуван за прв вицепремиер“, изјави Заев.
ЦИВИЛНИ ВЕСТИ
ЦИВИЛ организираше серија панел дискусии и други онлајн настани со заеднички наслов „Национализам“ на 18 и 19 август. Настаните, во најголем дел, се пренесуваа во живо на Фејсбук страницата на организацијата, а повеќе содржини беа и ќе бидат објавени на медиумската платформа на организацијата. Настаните се дел од најновата акција на ЦИВИЛ „Граѓански форум за учество во креирање на владините политики“. Настаните се совпаднаа со успешното завршување на меѓупартиските преговори за формирање влада.
Рамуш Муарем – Цирко во разговор за ЦИВИЛ Медиа вели дека национализмот за жал повторно се повампирува. Тој вели дека „мајтапењето“ со техничкиот премиер Оливер Спасовски, кој се обрати на ромски јазик по повод денот на Ромите 8 април, всушност е класичен национализам со тоа што се исмејува и понижува ромскиот јазик и ромскиот народ.
Мерита Максути, активистката за животна средина, зборуваше за свесноста и пристапот на општеството и власта кон зелените вредности. Интервјуто е дел од проектот „Зелените доаѓаат“ што ЦИВИЛ го спроведува во соработка со Фондацијата Хајнрих Бел. Според неа зелените вредности се малку застапени и се зборува за нив бидејќи луѓето не го разбираат како концепт, сет од вредности.
ФЛЕШ ВЕСТИ
Внатрепартиски тензии: Ограноците на ДУИ во Чаир и Сарај незадоволни од именувањата на Груби и Османи во новата влада. За оваа одлука се побуниле Изет Меџити и Арбен Зибери, по барање на нивните членови.
Голема раздвиженост на пратеници во Собранието на Република Северна Македонија, кои денеска се очекуваше да присуствуваа на седница за реизбор на Талат Џафери за претседател на Собранието. Неофицијално се дознава дека денеска пратениците ви Собрание биле повикани за да се потпишат на предлогот за избор на Џафери, а седницата ќе се одржи утре.
Владата ја донесе одлуката како ќе се одвива наставата во учебната 2020/2021 година, а се очекува да биде одреден и нејзиниот почеток што зависи од функционирањето на Собранието
СДСМ бара оставка од Христијан Мицкоски, сметајќи дека треба да го оствари ветувањето дека ќе поднесе оставка доколку ги изгуби изборите или доколку не направи Влада.
СЛОБОДНА ЗОНА
Не грижете се доколку детето не ви учи добро или не покажува посебен интерес за ништо. Доколку ги изговара брзо и без размислување зборовите: сакам, знам, можам и не сум крив, сè е в ред. Го чека сигурна и светла иднина, пишува Мирјана Најчевска во колумната „Сакам, знам, можам, не сум крив“.
Б. Јордановска