Кошаркарските репрезентации на Северна Македонија и Романија играа во Куманово на 2 август, во втората рунда на европските претквалификации за Светското првенство во кошарка 2027 година. За време на натпреварот се пееше: „Нека разберат клетите Шиптари, македонско име нема да загине“ и се извикуваа паролите „Гасни комори за Шиптари“, „Добар Шиптар, мртов Шиптар“, „Чиста, чиста Македонија“ и други.
ЦИВИЛ – Центар за слобода, како граѓанска организација за човекови права и слободи и Редакцијата при медиумската платформа ЦИВИЛ МЕДИА, ги постави следниве прашања до вицепремиерот и министер за политички систем и односи меѓу заедниците, Иван Стоилковиќ:
- Зошто не реагиравте за време на натпреварот?
- Што презедовте, а што планирате да преземете во претстојниот период во врска со екстремниот говор на омраза врз етничка основа и повиците за геноцид, како на спортските трибини, така и во поширок општествен контекст?
Одговорот на вицепремиерот и министер Стоилковиќ ви го пренесуваме во целост:
„Спортските сали и стадиони се места за спорт, фер-плеј и заедништво – не за поделби, навреди и ксенофобични скандирања. Како министер за односи меѓу заедниците силно го осудувам секој говор на омраза и национализам, без разлика од која страна доаѓа. Тоа не е гласот на граѓаните, туку на мали групи кои сакаат да ги нарушат меѓунационалните односи и политичката стабилност на државата.
Ги повикувам сите чинители, институции, спортски клубови и навивачки групи да покажат одговорност – затоа што спортот треба да нè поврзува и обединува, а не да нè раздвојува.
Верувам дека со заедничка посветеност – и од институциите, и од спортските клубови, но и од самите граѓани – можеме да градиме општество на заемно разбирање, каде што различностите се вредност, а не причина за поделби. Затоа, потребна е зрелост, воздржаност и одговорност од сите страни. Само така ќе продолжиме да ја градиме Македонија како заеднички дом на сите нејзини граѓани“, вели Стоилковиќ за ЦИВИЛ.
ЦМДТ
