Познати фрази и повикување на радикализација, напуштање и бојкот на институциите, но и на „одбрана“, „борба“ и „крв“. Со жестока, потпалувачка реторика на протестот пред Кривичен суд во Скопје, пратеници и партиски функционери на ВМРО-ДПМНЕ се нафрлија на денешната полициска акција за приведување на осомничените за терористички напад на Собранието на 27 април оваа година.
На говорницата, меѓу другите, се појавија Филип Петровски, пратеникот Крсто Јовановски и Владимир Ѓорчев кој го отвори својот говор со равенки, дека во 124 години има исто толку лета и зими.
Најчестиот мотив во говорите пред Кривичен суд се децата и семејствата на приведените, „умирањето на демократијата“ во Македонија, „предавството“ на сегашната власт, односно „хунтата“, која „ја продаде земјата“, „го менува името“, „воведува двојазичност“… И понатаму, освен националистичките изливи и говорот на омразата, низ говорите невешто провејува вокабуларот на извештаите за кршење на човековите права кои се однесуваа на владеењето на ВМРО-ДПМНЕ во изминатите 11 години.
Претседателот Ѓорге Иванов кратко се обрати во 19:15 часот. Побара владеење на правото. Притоа, искажа безрезервна поддршка на иницијативата „За заедничка Македонија“ која стоеше зад протестите во април, кои ескалираа со насилство и терористички напад на Собранието, со што отворено застана во одбрана на напаѓачите.
Ноќва се очекува одлука на Кривичен за тоа кој ќе оди дома, а кој во притворот во Шутка. На протестот е најавен говор и на Никола Груевски.
Пред Кривичен суд се собрани стотина луѓе. Од разгласот веќе втор пат се врти истата плеј листа со патриотски песни на македонски јазик. Од другата страна на булеварот, стотина луѓе го прославуваат Денот на албанското знаме, со петарди и плеј листа со патриотски песни на албански јазик.
Џ. Дерала
видео: Илија Балтовски
